റിയാദ്: ലയണല്‍ മെസ്സിയും ക്രിസ്റ്റ്യാനോ റൊണാള്‍ഡോയും വീണ്ടുമൊരു അങ്കത്തിനൊരുങ്ങുന്നു. ക്രിസ്റ്റ്യാനോ സഊദിയിലെ അല്‍ നസ്‌റിലേക്കും മെസ്സി യു.എസ്.എയിലെ ഇന്റര്‍ മയാമിയിലേക്കും ചേക്കേറിയതോടെ ഇനിയൊരു പോരാട്ടം ഉണ്ടാവില്ലെന്ന് കരുതിയവര്‍ക്ക് ആവേശം പകരുന്ന വാര്‍ത്തയാണ് ഇപ്പോള്‍ പുറത്തുവന്നിരിക്കുന്നത്.

ഏറെ നാളുകള്‍ക്ക് ശേഷം ഇരുവരും ഒരിക്കല്‍ കൂടി പരസ്പരം പോരിനിറങ്ങുന്ന കാര്യം ലയണല്‍ മെസ്സിയുടെ ക്ലബായ ഇന്റര്‍ മയാമി സമൂഹ മാധ്യമമായ എക്‌സിലൂടെ ഔദ്യോഗികമായി സ്ഥിരീകരിച്ചിരിക്കുകയാണ്. ഫെബ്രുവരി ഒന്നിന് റിയാദിലാണ് ഇന്റര്‍ മയാമിഅല്‍ നസ്ര്‍ മത്സരം നടക്കുക. ജനുവരി 29ന് അല്‍ ഹിലാലുമായും മത്സരമുണ്ട്. പ്രീ സീസണ്‍ ടൂറിന്റെ ഭാഗമായാണ് സൗഹൃദ മത്സരങ്ങള്‍.

ക്ലബ്ബിനും രാജ്യത്തിനും വേണ്ടി മെസ്സിയും റൊണാള്‍ഡോയും 35 തവണ പരസ്പരം ഏറ്റുമുട്ടിയിട്ടുണ്ട്. ഈ മത്സരങ്ങളില്‍ മെസ്സിയുടെ ടീമുകള്‍ 16 തവണ വിജയിച്ചപ്പോള്‍ റൊണാള്‍ഡോയുടെ ടീം 10 തവണ വിജയിച്ചു. ഒമ്പത് മത്സരങ്ങള്‍ സമനിലയില്‍ അവസാനിച്ചു. റൊണാള്‍ഡോയുടെ ടീമുകള്‍ക്ക് എതിരെ മെസ്സി 21 ഗോളുകളും 12 അസിസ്റ്റുകളും നേടിയിട്ടുണ്ട്. മെസ്സിയുടെ ടീമുകള്‍ക്ക് എതിരെ റൊണാള്‍ഡോ 20 ഗോളുകളും ഒരു അസിസ്റ്റും നേടിയിട്ടുണ്ട്.

വീണ്ടും മെസ്സിയും-റൊണാള്‍ഡോയും നേര്‍ക്കുനേര്‍; മത്സരം ഫെബ്രുവരി 1ന് റിയാദില്‍