കല്‍പ്പറ്റ: 'രാജ്യാഭിമാനം കാക്കുക, ആത്മാഭിമാനം ഉണര്‍ത്തുക' എന്ന പ്രമേയത്തില്‍ നടക്കുന്ന മുസ്‌ലിം യൂത്ത് ലീഗ് വയനാട് ജില്ലാ സമ്മേളനത്തിന് കല്‍പ്പറ്റ ചന്ദ്രഗിരി ഓഡിറ്റോറിയത്തില്‍ തുടക്കം. ജില്ലയിലെ ആദ്യകാല യൂത്ത് ലീഗ് നേതാക്കള്‍ യുവതലമുറയുമായി നടത്തിയ സ്മൃതി സദസോടെയാണ് സമ്മേളനം ആരംഭിച്ചത്. ശാഖാതലങ്ങളില്‍ നിന്നും തെരഞ്ഞെടുക്കപ്പെട്ട 1000 യുവതി യുവാക്കളാണ് സമ്മേളനത്തില്‍ പങ്കെടുക്കുന്നത്.
പഴയകാല ഓര്‍മ്മകളുടെ മധുരസ്മരണകളുണര്‍ത്തിയ സ്മൃതി സദസ് പുതുതലമുറയിലെ പ്രവര്‍ത്തകര്‍ക്ക് നവ്യാനുഭവമായി. സ്മൃതി സദസില്‍ ജില്ലയിലെ ആദ്യകാല യൂത്ത് ലീഗ് നേതാക്കള്‍ യുവതലമുറയുമായി സദസില്‍ സംവദിച്ചു. ജില്ലാ പ്രസിഡന്റ് യഹ്‌യാഖാന്‍ തലക്കല്‍ പതാകയുയര്‍ത്തി. വയനാട് ജില്ലാ യൂത്ത് ലീഗിന്റെ പ്രഥമ ജനറല്‍ സെക്രട്ടറി പി.കെ അബൂബക്കര്‍ ഉദ്ഘാടനം ചെയ്തു. ജില്ലാ പ്രസിഡന്റ് യഹ് യാഖാന്‍ അധ്യക്ഷനായി. ഇന്ന് വിവിധ സെഷനുകളിലായി നടക്കുന്ന ക്ലാസുകളിലും പൊതുസമ്മേളനത്തില്‍ മുസ്‌ലിം ലീഗ് അഖിലേന്ത്യാ ട്രഷറര്‍ പി.കെ കുഞ്ഞാലിക്കുട്ടി, സംസ്ഥാന ജനറല്‍ സെക്രട്ടറി കെ.പി.എ മജീദ്, പാണക്കാട് സ്വാദിഖലി ശിഹാബ് തങ്ങള്‍, മുന്‍ മന്ത്രി ഡോ. എം.കെ മുനീര്‍ സംബന്ധിക്കും. ഇന്ന് രാവിലെ 10 മണിക്ക് നടക്കുന്ന ഉദ്ഘാടന സമ്മേളനം മുന്‍മന്ത്രി ഡോ. എം.കെ മുനീര്‍ ഉദ്ഘാടനം ചെയ്യും.
യൂത്ത് ലീഗ് സംസ്ഥാന ജനറല്‍ സെക്രട്ടറി സി.കെ സുബൈര്‍, സെക്രട്ടറി കെ. എ മുജീബ്, സി. മമ്മൂട്ടി എം.എല്‍, ജില്ലാ ലീഗ് ട്രഷറര്‍ എം.എ മുഹമ്മദ് ജമാല്‍, സെക്രട്ടറി ടി. മുഹമ്മദ്, ജില്ലാ പഞ്ചായത്ത് വൈസ് പ്രസിഡന്റ് പി.കെ അസ്മത്ത്, എം.എസ്.എഫ് സംസ്ഥാന ജനറല്‍ സെക്രട്ടറി എം.പി നവാസ്, ജില്ലാ സെക്രട്ടറി റിയാസ് കല്ലുവയല്‍ സംസാരിക്കും. തുടര്‍ന്ന് നടക്കുന്ന 'ഫാസിസം, ന്യൂനപക്ഷം' സെഷനില്‍ ടി.എ അഹമ്മദ് കബീര്‍ എം.എല്‍.എയും 'സ്ത്രീപക്ഷ രാഷ്ട്രീയം' എന്ന വിഷയത്തില്‍ ഹരിത സംസ്ഥാന പ്രസിഡന്റ് അഡ്വ. ഫാത്തിമ തഹ്‌ലീയയും, 'ബഹുസ്വരത' എന്ന വിഷയത്തില്‍ യൂത്ത് ലീഗ് സംസ്ഥാന പ്രസിഡന്റ് പി.എം സാദിഖലിയും വിഷയങ്ങള്‍ അവതരിപ്പിക്കും. സംഘടനാ പ്രമേയപ്രഖ്യാപനം ജില്ലാ വൈസ് പ്രസിഡന്റ് അബ്ദുല്‍ ഗഫൂര്‍ കാട്ടിയും സംഘടനാ റിപ്പോര്‍ട്ട് ജില്ലാ സെക്രട്ടറി കെ ഹാരിസും അവതരിപ്പിക്കും.
 വൈകിട്ട് മൂന്നിന് നടക്കുന്ന സമാപന സമ്മേളനം മുസ്‌ലിം ലീഗ് അഖിലേന്ത്യാ ട്രഷറര്‍ പി.കെ കുഞ്ഞാലിക്കുട്ടി ഉദ്ഘാടനം ചെയ്യും. പാണക്കാട് സയ്യിദ് സ്വാദിഖലി ശിഹാബ് തങ്ങള്‍ മുഖ്യപ്രഭാഷണം നിര്‍വഹിക്കും. മുസ്‌ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്, ജില്ലാ പ്രസിഡന്റ് പി.പി.എ കരീം, ജനറല്‍ സെക്രട്ടറി കെ.കെ അഹമ്മദ് ഹാജി സംസാരിക്കും. യൂത്ത് ലീഗ് ജില്ലാ പ്രസിഡന്റ് യഹ്‌യാഖാന്‍ തലക്കല്‍ അധ്യക്ഷനാകും. ജനറല്‍ സെക്രട്ടറി പി. ഇസ്മായില്‍ സ്വാഗതവും ട്രഷറര്‍ കെ.എം. ഷബീര്‍ അഹമ്മദ് നന്ദിയും പറയും.