തിരുവനന്തപുരം: തന്നെ അറിയിക്കാതെ കുഞ്ഞിനെ കൊണ്ടുപോയെന്ന പേരൂര്‍ക്കട സ്വദേശിനി അനുപമ എസ്. ചന്ദ്രന്റെ പരാതിയില്‍ ദത്ത് നടപടികള്‍ കുടുംബകോടതി സ്‌റ്റേചെയ്തു. കേസ് അടുത്തമാസം ഒന്നിന് വീണ്ടും പരിഗണിക്കും. അതുവരെയാണ് സ്റ്റേ.
കേസിലെ തുടര്‍നടപടികള്‍ അറിയിക്കണമെന്ന് സര്‍ക്കാരിനോട് ആവശ്യപ്പെട്ട കോടതി അന്വേഷണ റിപ്പോര്‍ട്ട് മുദ്രവച്ച കവറില്‍ സമര്‍പ്പിക്കാന്‍ പൊലിസിന് നിര്‍ദേശം നല്‍കി.
പരാതി പരിഗണിക്കവെ ശിശുക്ഷേമസമിതിയെ കോടതി വിമര്‍ശിച്ചു. കുഞ്ഞിനെ കൈമാറിയതാണോ ആരെങ്കിലും ഉപേക്ഷിച്ചതാണോ എന്ന കാര്യത്തില്‍ വ്യക്തതവരുത്തണമെന്ന് കോടതി ആവശ്യപ്പെട്ടു. സമിതി ജനറല്‍ സെക്രട്ടറി ഷിജുഖാന്റെ സാക്ഷ്യപ്പെടുത്തല്‍ ഇല്ലാതെയാണ് സത്യവാങ്മൂലം നല്‍കിയത്. കുഞ്ഞിന്റെ ഡി.എന്‍.എ പരിശോധന നടത്തണം. സംസ്ഥാന സര്‍ക്കാര്‍ ഇക്കാര്യത്തില്‍ തീരുമാനം അറിയിക്കണമെന്നും കോടതി പറഞ്ഞു. അന്തിമ വിധി വരുന്നതുവരെ കുഞ്ഞ് ദത്തെടുത്ത ദമ്പതികള്‍ക്കൊപ്പം കഴിയട്ടെയെന്നും കോടതി വ്യക്തമാക്കി. പരാതിയുമായി ബന്ധപ്പെട്ട കേസ് ഡയറി ഹാജരാക്കാനും കോടതി ആവശ്യപ്പെട്ടു.
ഇപ്പോള്‍ ദത്തെടുത്ത ആന്ധ്രപ്രദേശിലെ ദമ്പതികള്‍ക്ക് കുഞ്ഞിനെ കൈമാറുന്ന വിധി പുറപ്പെടുവിക്കുന്നതിനു വേണ്ടിയാണ് ഇന്നലത്തേക്ക് കേസ് പരിഗണിക്കാന്‍ നിശ്ചയിച്ചിരുന്നത്. ഇതിനിടെ അനുപമ കേസില്‍ കക്ഷിചേരുകയും സര്‍ക്കാര്‍ തടസഹരജി നല്‍കുകയുംചെയ്തു. താനറിയാതെയാണ് കുഞ്ഞിനെ കൈമാറിയതെന്നും കുഞ്ഞിനെ തിരികെവേണമെന്നും ചൂണ്ടിക്കാട്ടിയാണ് അനുപമ കേസില്‍ കക്ഷിചേര്‍ന്നത്.
ദത്ത് നടപടികള്‍ പൂര്‍ത്തിയാവാന്‍ ജനുവരി വരെ സമയമുണ്ട്. ഇതിനിടെ കുഞ്ഞുമായി രക്തബന്ധമുളളവര്‍ അവകാശവാദമുന്നയിച്ചതിനാലും ദത്തെടുക്കല്‍ നടപടികളില്‍ വീഴ്ചയുണ്ടായതിനാലും ദത്ത് റദ്ദാക്കി കുഞ്ഞിനെ തിരികെ വേണമെന്നാണ് അനുപമയുടെ വാദം.
കുഞ്ഞിന്റെ അവകാശവുമായി ബന്ധപ്പെട്ട് തര്‍ക്കമുണ്ടെന്നും ദത്ത് നല്‍കി അന്തിമവിധി പുറപ്പെടുവിക്കരുതെന്നും സര്‍ക്കാരിന് വേണ്ടി ഹാജരായ അഭിഭാഷകനും അറിയിച്ചു.