ധാംബുള്ള: ശ്രീലങ്കക്കെതിരായ മൂന്നാം ഏകദിനത്തില്‍ ആസ്‌ത്രേലിയക്ക് ജയം. രണ്ടു വിക്കറ്റിനാണ് ഓസീസ് വിജയം സ്വന്തമാക്കിയത്. ഇതോടെ അഞ്ചു മത്സരങ്ങളടങ്ങിയ പരമ്പരയില്‍ ആസ്‌ത്രേലിയ 2-1നു മുന്നിലെത്തി. ആദ്യം ബാറ്റു ചെയ്ത ശ്രീലങ്ക 49.2 ഓവറില്‍ 226 റണ്‍സിനു പുറത്തായപ്പോള്‍ 46 ഓവറില്‍ എട്ടു വിക്കറ്റ് നഷ്ടത്തില്‍ ആസ്‌ത്രേലിയ 227 റണ്‍സെടുത്തു വിജയിക്കുകയായിരുന്നു. ജോര്‍ജ് ബെയ്‌ലി (70), മാത്യു വെയ്ഡ് (42), ട്രവിസ് ഹെഡ്ഡ് (36) എന്നിവരുടെ ബാറ്റിങാണ് ഓസീസിനു വിജയമൊരുക്കിയത്. നേരത്തെ ദിനേഷ് ചാന്‍ഡിമല്‍ നേടിയ സെഞ്ച്വറിയുടെ (102) പിന്‍ബലത്തിലാണ് ശ്രീലങ്ക 226 റണ്‍സെടുത്തത്. അവസാന ഏകദിനം കളിച്ച ദില്‍ഷന്‍ 42 റണ്‍സെടുത്തു. ആസ്‌ത്രേലിയക്കായി ആദം സാംപ മൂന്നു വിക്കറ്റ് വീഴ്ത്തി.