എൻ.സി ഷെരീഫ്
മഞ്ചേരി
സംസ്ഥാനത്ത് വന്നുപോകുന്ന അതിഥിത്തൊഴിലാളികളെ കുറിച്ച് തൊഴിൽ വകുപ്പിന്റെ പക്കൽ വ്യക്തമായ കണക്കുകളില്ല.
ലോക്ക്ഡൗൺ കാലയളവിൽ ചങ്ങനാശ്ശേരി പായിപ്പാട് കവലയിൽ തൊഴിലാളികൾ സംഘടിച്ച് തെരുവിലിറങ്ങിയതും കിഴക്കമ്പലത്തെ കിറ്റെക്‌സ് കമ്പനിയിലെ തൊഴിലാളികൾ അക്രമം നടത്തിയതും ചർച്ചയായെങ്കിലും ഇവരുടെ കണക്കെടുക്കാനുള്ള പദ്ധതികളൊന്നും പൂർത്തിയാക്കാൻ സാധിച്ചിട്ടില്ല.
എത്ര അതിഥിത്തൊഴിലാളികൾ ഉണ്ടെന്ന ചോദ്യത്തിന് തൊഴിൽ വകുപ്പിന് വ്യക്തമായ ഉത്തരമില്ല. തൊഴിലാളികളെ എത്തിക്കുന്ന സ്‌പോൺസർമാരുടേയും തൊഴിൽ വകുപ്പിന്റെയും കണക്കുകൾ തമ്മിൽ വലിയ അന്തരമാണുള്ളത്.
തൊഴിലാളികളുടെ സുരക്ഷയ്ക്കായി സർക്കാർ വിവിധ പദ്ധതികൾ പ്രഖ്യാപിച്ചിരുന്നു. ഇതൊന്നും കാര്യക്ഷമമായി നടപ്പാകാത്തതും വിവിധ സംസ്ഥാനങ്ങളിൽനിന്ന് തൊഴിലാളികളെ എത്തിക്കുന്ന കരാറുകാരുടെ അശ്രദ്ധയുമാണ് അതിഥിത്തൊഴിലാളികളുടെ കൃത്യമായ വിവരങ്ങൾ ലഭ്യമാകാതിരിക്കാൻ കാരണം.

ആവാസ് പദ്ധതി കാര്യക്ഷമമായി നടപ്പാക്കാൻ ആയില്ല. അതിഥിത്തൊഴിലാളികളുടെ വിവരങ്ങൾ ശേഖരിക്കാൻ തൊഴിൽ വകുപ്പ് പലകുറി ഓടിയിട്ടും പൂർത്തിയാക്കാനായിട്ടില്ല.
നേരത്തെ പ്രഖ്യാപിച്ച ആവാസ് പദ്ധതി കാര്യക്ഷമമായി നടപ്പാക്കിയിരുന്നെങ്കിൽ സംസ്ഥാനത്ത് എത്ര അതിഥിത്തൊഴിലാളികളാണ് താമസിക്കുന്നതെന്ന് എളുപ്പത്തിൽ കണ്ടെത്താമായിരുന്നു.
സംസ്ഥാനത്ത് 10 ലക്ഷത്തോളം അതിഥിത്തൊഴിലാളികൾ ഉണ്ടെന്നാണ് ഔദ്യോഗിക വിവരം. എന്നാൽ ഇവരെ ജോലിക്ക് എത്തിക്കുന്ന കരാറുകാരുടെ കണക്കുപ്രകാരം 15 ലക്ഷത്തിലധികം അതിഥിത്തൊഴിലാളികളാണ് സംസ്ഥാനത്തുള്ളത്. തിരുവനന്തപുരം 61551, കൊല്ലം 24849, പത്തനംതിട്ട 24059, ആലപ്പുഴ 36929, ഇടുക്കി 19551, കോട്ടയം 32908, എറണാകുളം, 112567, തൃശൂർ 41900, പാലക്കാട് 24694, മലപ്പുറം 29856, കോഴിക്കോട് 44363, വയനാട് 11558, കണ്ണൂർ 28723, കാസർക്കോട് 15858 എന്നിങ്ങനെയാണ് ഓരോ ജില്ലയിലും ആവാസ് പദ്ധതിയിലൂടെ ആരോഗ്യ സുരക്ഷാ കാർഡ് ലഭിച്ച അതിഥിത്തൊഴിലാളികളുടെ കണക്ക്.

ഓരോ ജില്ലയിലും ഈ പദ്ധതിയിൽ ഉൾപ്പെടാത്ത ആയിരക്കണക്കിന് തൊഴിലാളികളാണുള്ളത്. കേരളത്തിൽ എത്തുന്നവരുടെയും തിരിച്ച് പോകുന്നവരുടെയും വിവരങ്ങൾ തൊഴിൽ വകുപ്പിനെ അറിയ്ക്കാൻ തൊഴിലാളികളെ എത്തിക്കുന്ന കരാറുകാർ തയാറാകാത്തതും പ്രയാസം സൃഷ്ടിക്കുകയാണ്.