ചെന്നൈ: വളകാപ്പ് ചടങ്ങിനായി ചെന്നൈയില്‍ നിന്നു തെങ്കാശിയിലേക്കു പോവുകയായിരുന്നു കസ്തൂരി.  കടലൂര്‍ ജില്ലയിലെ വിരുദാചലത്തിന് സമീപം വച്ച് വ്യാഴാഴ്ച രാത്രിയാണ് അപകടമുണ്ടായത്. ഏഴുമാസം ഗര്‍ഭിണിയായിരുന്ന യുവതി ഛര്‍ദിക്കാനായി കംപാര്‍ട്‌മെന്റിലെ വാഷ്ബേസിന് സമീപം നില്‍ക്കവേ പുറത്തേക്കു തെറിച്ചുവീഴുകയായിരുന്നു. ബന്ധുക്കള്‍ ഉടന്‍ തന്നെ അപായച്ചങ്ങല വലിച്ചെങ്കിലും ട്രെയിന്‍ നിന്നില്ല. തുടര്‍ന്ന് അടുത്ത കംപാര്‍ട്‌മെന്റില്‍ പോയി അപായച്ചങ്ങല വലിച്ച് ട്രെയിന്‍ നിര്‍ത്തിച്ചു. അപ്പോഴേക്കും ട്രെയിന്‍ എട്ട് കിലോമീറ്ററോളം പിന്നിട്ടിരുന്നു. 

കസ്തൂരിക്കായി ട്രാക്കില്‍ തിരച്ചില്‍ നടത്തിയെങ്കിലും കണ്ടെത്താന്‍ സാധിച്ചില്ല. തുടര്‍ന്ന് കുടുംബം റെയില്‍വേ പൊലീസില്‍ പരാതി നല്‍കി. പൊലീസ് നടത്തിയ തിരച്ചിലില്‍ വെള്ളിയാഴ്ച പുലര്‍ച്ചെ പൂവനൂരില്‍ നിന്നാണ് മൃതദേഹം കിട്ടിയത്.  അപായച്ചങ്ങല പ്രവര്‍ത്തിച്ചിരുന്നെങ്കില്‍ യുവതിയെ രക്ഷിക്കാനാകുമായിരുന്നെന്നു ബന്ധുക്കള്‍ പറയുന്നു. 9 മാസം മുന്‍പായിരുന്നു കസ്തൂരിയുടെ വിവാഹം. 

ട്രെയിന്‍ കൊല്ലത്ത് എത്തിയ ശേഷം റെയില്‍വേ അധികൃതരും ആര്‍പിഎഫ് ഉദ്യോഗസ്ഥരും കംപാര്‍ട്‌മെന്റില്‍ പരിശോധന നടത്തുകയും അപായച്ചങ്ങല കൃത്യമായി പ്രവര്‍ത്തിച്ചിരുന്നോ എന്നതും വീഴ്ച സംഭവിച്ചത് എവിടെയാണെന്നും കണ്ടെത്താന്‍ പ്രത്യേക സമിതിയെ നിയോഗിച്ചിട്ടുണ്ട്.