കേരളത്തില്‍ വീണ്ടും വെസ്റ്റ് നൈല്‍ പനി റിപ്പോര്‍ട്ട് ചെയ്തിരിക്കുകയാണ്. കോഴിക്കോട്,മലപ്പുറം, തൃശൂര്‍ ജില്ലകളില്‍ ജാഗ്രത മുന്നറിയിപ്പുണ്ട്. ആരോഗ്യകാര്യങ്ങളില്‍ അതീവ ജാഗ്രത വേണം. കൊതുകിലൂടെ പടരുന്ന ഈ രോഗത്തെക്കുറിച്ച് പലര്‍ക്കും വലിയ ധാരണയില്ലെന്നതാണ് യാഥാര്‍ത്ഥ്യം. 

എന്താണ് വെസ്റ്റ് നൈല്‍ പനി?

ക്യൂലക്‌സ് എന്ന കൊതുക് പരത്തുന്ന രോഗമാണ് വെസ്റ്റ് നൈല്‍ പനി. പക്ഷികളിലും ഈ രോഗബാധ കാണാറുണ്ട്. ഈ രോഗബാധ മനുഷ്യരില്‍ മാരകമായ ന്യൂറോളജിക്കല്‍ പ്രശ്‌നങ്ങള്‍ക്ക് കാരണമാകുന്നു എന്നാണ് പറപ്പെടുന്നത്. 1937ല്‍ ഉഗാണ്ടയിലാണ് ഈ രോഗം ആദ്യമായി കണ്ടെത്തിയത്. കേരളത്തില്‍ ആദ്യമായി 2011ലാണ് രോഗം സ്ഥിരീകരിച്ചത്. 2019ല്‍ മലപ്പുറത്ത് ആറ് വയസുകാരന്‍ വെസ്റ്റ് നൈല്‍ ബാധിച്ച് മരണപ്പെട്ടിരുന്നു. മനുഷ്യരില്‍ നിന്ന് മനുഷ്യരിലേക്ക് പൊതുവെ ഈ രോഗം പടരില്ല. എന്നാല്‍ പക്ഷികള്‍ക്കും മൃഗങ്ങളെയുമൊക്കെ കൊതുക് കടിക്കും.

ലക്ഷണങ്ങള്‍ 

കടുത്ത തലവേദന, പനി, കഴുത്ത് വേദന, തലകറക്കം, ഓര്‍മ്മ നഷ്ടപ്പെടുക എന്നിവയെല്ലാം വെസ്റ്റ് നൈല്‍ പനിയുടെ ലക്ഷണങ്ങളാണ്. എല്ലാ പ്രായകാര്‍ക്കും ഈ രോഗം പിടിപ്പെടാം. ചിലര്‍ക്ക് ഛര്‍ദ്ദിലും ഉണ്ടാകാറുണ്ട്. തലച്ചോറിനെ ബാധിക്കുന്നത് മൂലം ചിലര്‍ക്ക് ബോധക്ഷയവും മരണവും വരെ സംഭവിക്കാറുണ്ട്. ജപ്പാന ജ്വരത്തെ അപേക്ഷിച്ച് മരണ സംഖ്യ വളരെ കുറവാണ്.

പ്രതിരോധിക്കാം

• രോഗം വരാതിരിക്കാന്‍ കൊതുക് കടി ഏല്‍ക്കാതിരിക്കാന്‍ ശ്രദ്ധിക്കുക.
• വീടും പരിസരവും വ്യത്തിയായി സൂക്ഷിക്കുന്നതിലൂടെ കൊതുകിന്റെ വ്യാപനം കുറയ്ക്കാം.
• രാത്രി കടിക്കുന്ന കൊതുകുകളാണ് പൊതുവെ ഈ രോഗം പടര്‍ത്തുന്നത്.അതുകൊണ്ട് കിടക്കുമ്പോള്‍ കൊതുക് വലകള്‍ ഉപയോഗിക്കുക.
• കൊതുകിനെ തുരത്തുന്ന ലേപനങ്ങള്‍ പുരട്ടുക.
• കൊതുക് നശീകരണ ഉപകരണങ്ങള്‍ ഉപയോഗിക്കുക