ഗ്രാജുവേറ്റ് റൂട്ട് വിസ പ്രോഗ്രാമിന് സർക്കാർ നിയന്ത്രണം കൊണ്ടുവരുന്നു എന്ന അഭ്യൂഹങ്ങൾക്കിടെ വിസ നിലനിർത്തണം എന്ന ശുപാർശയുമായി അഡ്വൈസറി കമ്മിറ്റി. ബിരുദ പഠനത്തിനുശേഷം യുകെയിൽ തൊഴിൽ അനുവദിക്കുന്ന വിസ പ്രോഗ്രാമാണ് ഗ്രാജുവേറ്റ് റൂട്ട് വിസ. ഇത് ദുരുപയോഗം ചെയ്യപ്പെടുന്നുണ്ടെന്നും അനധികൃത കുടിയേറ്റം ഇതുവഴി കൂടുന്നുണ്ട് എന്നുമാണ് വാർത്ത പുറത്തു വന്നത്. ഇതിന്റെ അടിസ്ഥാനത്തിലാണ് വിസ നിരോധനമേർപ്പെടുത്താൻ യുകെ തീരുമാനമെടുക്കുന്നു എന്ന അഭ്യൂഹം പ്രചരിച്ചത്. എന്നാൽ ഇപ്പോൾ യുകെ മൈഗ്രേഷൻ അഡ്വൈസറി കമ്മിറ്റി റൂട്ട് വിസ നയം നിലനിർത്താൻ ശുപാർശ ചെയ്തിരിക്കുകയാണ്.

വിസ ദുരുപയോഗ കണ്ടെത്താൻ കഴിഞ്ഞിട്ടില്ലെന്നും വെറും അഭ്യൂഹങ്ങളുടെ പേരിൽ മിടുക്കരായ കുട്ടികളുടെ ഭാവി കളയരുതെന്നുമാണ് അഡ്വൈസറി കമ്മിറ്റി പറയുന്നത്. കൂടാതെ യുകെയിലെ വിദ്യാഭ്യാസ നിലവാരത്തെയും അക്കാദമിക് മികവിനെയും ഒരുതരത്തിലും റൂട്ട് വിസ തകർക്കുന്നില്ലെന്നും അതിനാൽ ഇത് നിലനിർത്തുന്നതാണ് അഭികാമ്യമെന്നും മൈഗ്രേഷൻ അഡ്വൈസറി കമ്മിറ്റി അഭിപ്രായപ്പെടുന്നു. നേരത്തെ ഉപരിപഠനത്തിന് യുകെയിലേക്ക് കുടിയേറുന്നവരുടെ എണ്ണം വൻതോതിൽ കുറയുന്നതായി അടുത്തിടെ വന്ന സർവേ ചൂണ്ടിക്കാട്ടിയിരുന്നു. യുകെയിലെ 75 സർവകലാശാലകളെയാണ് സർവ്വേയിൽ ഉൾപ്പെടുത്തിയത്. ഇതിൽ 90 ശതമാനത്തിലേറെ കുറവാണ് രേഖപ്പെടുത്തിയത്.

ഈ വർഷം മാത്രം 27% കുറവുണ്ടായതായി സർവ്വേ വ്യക്തമാക്കി. റൂട്ട് വിസ നയങ്ങളെ സംബന്ധിച്ചുള്ള അഭ്യൂഹങ്ങളും ആശങ്കയും സർവ്വകലാശാലകളിലെ അപേക്ഷാകുറവിന് കാരണമായിട്ടുണ്ട് എന്നാണ് പൊതുവേ വിലയിരുത്തപ്പെടുന്നത്. ഇതുവരെ ബ്രിട്ടനിലെ സ്റ്റുഡന്റ് വിസ കൂടുതലായി പ്രയോജനപ്പെടുത്തി വന്നിരുന്നത് ഇന്ത്യൻ വിദ്യാർഥികളായിരുന്നു. സർവ്വകലാശാലകളുടെ സാമ്പത്തികസ്ഥിരതയെ ഇത് ബാധിക്കുമെന്ന ആശങ്കയും ഉയർന്നു വരുന്നുണ്ട്.

കരിയര്‍ വാര്‍ത്തകള്‍ ഓണ്‍ലൈനില്‍ ലഭിക്കാന്‍ ഈ ഗ്രൂപ്പ് ജോയിന്‍ ചെയ്യുക