ഛണ്ഡിഗഢ്: പ്രധാനമന്ത്രിയുടെ റാലിയില്‍ പതിഷേധിക്കരുതെന്ന് കര്‍ഷകരോട് അഭ്യര്‍ഥിച്ച് ബി.ജെ.പി പഞ്ചാബ് നേതൃത്വം. കര്‍ഷകര്‍ അവര്‍ നേരിടുന്ന പ്രശ്‌നങ്ങള്‍ സംബന്ധിച്ച് ബി.ജെ.പിക്ക് മെമ്മോറാണ്ടം സമര്‍പ്പിച്ചാല്‍ അത് പ്രധാനമന്ത്രിക്ക് കൈമാറാമെന്നും പാര്‍ട്ടി സംസ്ഥാന നേതൃത്വം വ്യക്തമാക്കിയിട്ടുണ്ട്. മെയ് 23ന് പഞ്ചാബിലെ പട്യാലയിലും 24ന് ഗുരുദാസ്പൂര്‍, ജലന്ധര്‍ എന്നിവിടങ്ങളിലുമാണ് മോദിയുടെ റാലി നടക്കുക. ഈ സ്ഥലങ്ങളില്‍ റാലി നടക്കുമ്പോള്‍ പ്രതിഷേധിക്കുമെന്ന് കര്‍ഷക സംഘടനകള്‍ അറിയിച്ചിരുന്നു. സ്വാമിനാഥന്‍ കമ്മിറ്റി നിര്‍ദേശിച്ച മിനിമം താങ്ങുവില ലഭ്യമാക്കണമെന്ന് ആവശ്യപ്പെട്ടാണ് കര്‍ഷക സംഘടനകളുടെ പ്രതിഷേധം.

കര്‍ഷകരുടെ ഡല്‍ഹി ചലോ മാര്‍ച്ച് തടയാന്‍ വേണ്ടി ഹരിയാന പൊലീസ് നടത്തിയ നടപടികളിലും സംഘടനകള്‍ക്ക് പ്രതിഷേധമുണ്ട്. പൊലീസ് നടപടിയില്‍ നിരവധി പേര്‍ക്ക് പരുക്കേല്‍ക്കുകയും ചെയ്തിരുന്നു. ഇതിന് പിന്നാലെയാണ് മോദി പങ്കെടുക്കുന്ന റാലിയില്‍ പ്രതിഷേധിക്കാന്‍ കര്‍ഷകര്‍ തീരുമാനിച്ചത്. കര്‍ഷകരുടെ ആവശ്യങ്ങള്‍ പ്രധാനമന്ത്രി നരേന്ദ്ര മോദിക്ക് മുന്നിലെത്തിക്കുമെന്ന് തങ്ങള്‍ ഉറപ്പ് നല്‍കുന്നു- ബി.ജെ.പി ദേശീയ എക്‌സിക്യൂട്ടീവ് അംഗം മനോരഞ്ജന്‍ ഖലിയ പറഞ്ഞു. പ്രധാനമന്ത്രി മെമ്മോറാണ്ടത്തെ പോസിറ്റീവായി കണ്ട് പ്രശ്‌നങ്ങള്‍ക്ക് പരിഹാരമുണ്ടാക്കും. റാലിക്കിടെ പ്രതിഷേധക്കുന്നത് പ്രശ്‌നത്തിന് പരിഹാരമുണ്ടാക്കില്ലെന്നും അദ്ദേഹം വ്യക്തമാക്കി.

കര്‍ഷകര്‍ ചര്‍ച്ച ചെയ്ത് അവരുടെ ആവശ്യങ്ങളില്‍ ഏകസ്വരമുണ്ടാക്കണമെന്ന് ബി.ജെ.പി സംസ്ഥാന അധ്യക്ഷന്‍ സുനില്‍ ജാക്കര്‍ പറഞ്ഞു. ഒരുമിച്ചിരുന്ന് ചര്‍ച്ച ചെയ്ത് ആവശ്യങ്ങള്‍ സംബന്ധിച്ച് കര്‍ഷക സംഘടനകള്‍ ധാരണയിലെത്തണമെന്നും ഇപ്പോള്‍ കര്‍ഷക സംഘടന നേതാക്കള്‍ വ്യത്യസ്ത അഭിപ്രായങ്ങളാണ് പ്രകടിപ്പിക്കുന്നതെന്നും അദ്ദേഹം ചൂണ്ടിക്കാട്ടി.