ഗസ്സ സിറ്റി: റഫയില്‍ കൂട്ടക്കുരുതി നടത്താന്‍  ഇസ്‌റാഈല്‍ സൈന്യം ഉപയോഗിച്ചത് അമേരിക്കന്‍ നിര്‍മിത യുദ്ധോപകരണങ്ങളെന്ന് റിപ്പോര്‍ട്ട്. സംഭവസ്ഥലത്തുനിന്നുള്ള ദൃശ്യങ്ങള്‍ വിശകലനം ചെയ്താണ് ഇക്കാര്യം സ്ഥിരീകരിച്ചതെന്ന്  സി.എന്‍.എന്‍ റിപ്പോര്‍ട്ട് ചെയ്യുന്നു. 

യു.എസ് നിര്‍മ്മിത ജി.ബി.യു 39 എന്ന ബോംബാണ് ഇവിടെ ഉപയോഗിച്ചതെന്ന് സി.എന്‍.എന്‍ റിപ്പോര്‍ട്ടില്‍ പറയുന്നു. നാല് ആയുധ വിദഗ്ധരുടെ നേതൃത്വത്തിലാണ് ഇവ പരിശോധിച്ചത്. യുദ്ധസാമഗ്രികളുടെ അവശിഷ്ടങ്ങളില്‍ കാണുന്ന സീരിയല്‍ നമ്പറുകള്‍ കാലിഫോര്‍ണിയ ആസ്ഥാനമായുള്ള നിര്‍മ്മാതാക്കളുമായി പൊരുത്തപ്പെടുന്നതായും റിപ്പോര്‍ട്ടില്‍ വ്യക്തമാക്കുന്നു.

അതേസമയം, ആക്രമണം സംബന്ധിച്ച അന്വേഷണം സൂക്ഷ്മമായി നിരീക്ഷിക്കുന്നുണ്ടെന്ന് അമേരിക്ക അറിയിച്ചു. അതിദാരുണമായ തെറ്റാണ് സംഭവിച്ചതെന്ന് ഇസ്‌റാഈല്‍ സമ്മതിച്ചിട്ടുണ്ടെന്ന് ദേശീയ സുരക്ഷാ കൗണ്‍സില്‍ വക്താവ് ജോണ്‍ കിര്‍ബി വൈറ്റ് ഹൗസില്‍ മാധ്യമപ്രവര്‍ത്തകരോട് പറഞ്ഞു. കൂടുതല്‍ നാശനഷ്ടങ്ങളും മരണങ്ങളും വരുത്തിവെക്കുന്ന ദൗത്യങ്ങള്‍ റഫയില്‍ കാണാന്‍ ആഗ്രഹിക്കുന്നില്ലെന്നും അദ്ദേഹം കൂട്ടിച്ചേര്‍ത്തു.

റഫയിലെ ആക്രമണത്തില്‍ കുറഞ്ഞത് 45 പേര്‍ കൊല്ലപ്പെടുകയും 200ഓളം പേര്‍ക്ക് പരിക്കേല്‍ക്കുകയും ചെയ്തിരുന്നു. കത്തിക്കരിഞ്ഞ നിലയിലായിരുന്നു മൃതദേഹങ്ങള്‍. ഹമാസ് പോരാളികള്‍ താമസിക്കുന്ന സ്ഥലത്തേക്ക് ബോംബിട്ടപ്പോള്‍ സമീപത്തെ ടെന്റുകളിലേക്ക് തീപിടിക്കുകയായിരുന്നുവെന്നായിരുന്നു ഇസ്‌റാഈലിന്റെ ന്യായീകരണം.