തൃശൂർ: തൃശൂർ ജില്ലാ കോൺഗ്രസ് ആസ്ഥാനത്ത് (ഡിസിസി ഓഫീസ്) ഉണ്ടായ സംഘർഷത്തിൽ 20 പേർക്കെതിരെ കേസ്. ഡിസിസി പ്രസിഡന്റ് ജോസ് വള്ളൂർ അടക്കമുള്ളവർക്കെതിരെയാണ് കേസെടുത്തത്. തൃശൂരിലെ യുഡിഎഫ് സ്ഥാനാർഥിയായിരുന്ന മുൻ എം.പി കെ. മുരളീധരന്റെ അനുയായിയും ഡിസിസി സെക്രട്ടിയുമായ സജീവൻ കുരിയച്ചിറയെ കൈയേറ്റം ചെയ്ത സംഭവത്തിൽ ഉൾപ്പെടെയാണ് നടപടി. 

സജീവൻ കുരിയച്ചിറയുടെ പരാതിയിലാണ് നടപടി. അന്യായമായി സംഘം ചേരൽ, മർദ്ദിക്കൽ തുടങ്ങിയ വകുപ്പുകൾ ചേർത്താണ് കേസ് രജിസ്റ്റർ ചെയ്തത്. തൃശൂർ ഈസ്റ്റ് പൊലിസാണ് കേസെടുത്തിരിക്കുന്നത്. ചികിത്സയിൽ കഴിയുന്ന സജീവൻ കുരിയച്ചിറയുടെ മൊഴി പൊലിസ് രേഖപ്പെടുത്തി.

ലോക്‌സഭ തെരഞ്ഞെടുപ്പിൽ കോൺഗ്രസ് സ്ഥാനാർഥി കെ. മുരളീധരൻ മൂന്നാം സ്ഥാനത്തേക്ക് പിന്തള്ളപ്പെടുകയും തൃശൂർ സീറ്റിൽ ബിജെപി സ്ഥാനാർഥി സുരേഷ് ഗോപി ജയിച്ചതിനും പിന്നാലെയാണ് ഡിസിസി ഓഫീസിൽ നാടകീയ രംഗങ്ങൾ അരങ്ങേറിയത്. തെരഞ്ഞെടുപ്പ് തോൽവിയെച്ചൊല്ലിയുള്ള വാക്കുതർക്കങ്ങളാണ് കയ്യാങ്കളിയിലേക്ക് എത്തിയത്. കെ മുരളീധരന്റെ തെരഞ്ഞെടുപ്പ് പരാജയം ചൂണ്ടിക്കാട്ടി ഓഫീസിൽ പ്രത്യക്ഷപ്പെട്ട പോസ്റ്ററുകൾ താൻ ഒട്ടിച്ചതെന്ന് ചൂണ്ടിക്കാട്ടി ജോസ് വള്ളൂർ വിഭാഗം ആക്രമിച്ചെന്നായിരുന്നു സജീവന്റെ ആരോപണം.

യൂത്ത് കോൺഗ്രസ് പ്രവർത്തകർ മർദിച്ചുവെന്നാരോപിച്ച് സജീവൻ കുരിയച്ചിറ ഓഫീസിൽ പ്രതിഷേധിച്ചിരുന്നു. സജീവൻ കുരിയച്ചിറയെ ഡിസിസി പ്രസിഡന്റ് ജോസ് വള്ളൂരും അനുകൂലികളും ചേർന്ന് പിടിച്ചു തള്ളിയെന്നാണ് പരാതി. ജോസ് വള്ളൂർ ഉൾപ്പെടെ 20 പേർക്കെതിരെ തടഞ്ഞു നിർത്തി കൈയ്യേറ്റം ചെയ്തു എന്ന കുറ്റം ചുമത്തിയാണ് കേസെടുത്തിരിക്കുന്നത്. 

കേരളത്തിൽ മിന്നും ജയം നേടിയതിന്റെ ആഹ്ലാദത്തിൽ നിൽക്കുന്ന കോൺഗ്രസിന് കനത്ത നാണക്കേട് ഉണ്ടാക്കുന്ന സംഭവമാണ് ഉണ്ടായത്. കയ്യാങ്കളിയിൽ ഹൈക്കമാൻഡ് ഇന്നലെ തന്നെ നേതൃത്വത്തോട് വിശദീകരണം തേടിയിരുന്നു. സംസ്ഥനത്തെ കോൺ​ഗ്രസ് നേതൃത്വത്തിന് കടുത്ത അതൃപ്തിയാണുള്ളത്. ഡിസിസി കമ്മിറ്റി പിരിച്ചു വിടുന്ന തരത്തിൽ കർശന നടപടിയുണ്ടായേക്കുമെന്നാണ് സൂചന.