നടി കങ്കണയുടെ മുഖത്തടിച്ച ഉദ്യോഗസ്ഥക്ക് പെരിയാറിന്റെ ചിത്രമുള്ള സ്വര്ണ മോതിരം സമ്മാനം
ചെന്നൈ: നടിയും ബിജെപി എംപിയുമായ കങ്കണ റണൗട്ടിനെ ചണ്ഡീഗഢ് വിമാനത്താവളത്തില്വച്ച് മുഖത്തടിച്ച സിഐഎസ്എഫ് ഉദ്യോഗസ്ഥ കുല്വിന്ദര് കൗറിന് പാരിതോഷികവുമായി പെരിയാര് ദ്രാവിഡ കഴകം. പെരിയാറിന്റെ ചിത്രം മുദ്രണം ചെയ്ത സ്വര്ണമോതിരമാണ് കുല്വിന്ദര് കൗറിന് സമ്മാനമായി നല്കുന്നതെന്ന് പെരിയാര് ദ്രാവിഡ കഴകം അറിയിച്ചു.
അവരുടെ വീട്ടുവിലാസത്തിലേക്കാണ് മോതിരം അയച്ചുകൊടുക്കുക. ഇതയക്കുന്നതിനെന്തെങ്കിലും തടസം വന്നാല് നേരിട്ട് മോതിരം കൈമാറും. മോതിരത്തിനൊപ്പം പെരിയാറിന്റെ ചില പുസ്തകങ്ങളും സമ്മാനിക്കുമെന്നും പെരിയാര് ദ്രാവിഡകഴകം നേതാക്കള് വ്യക്തമാക്കി.
ഡല്ഹിയിലേക്ക് പോകുമ്പോഴായിരുന്നു ചണ്ഡീഗഢ് വിമാനത്താവളത്തില് വച്ച് കങ്കണയ്ക്ക് നേരെ ആക്രമണം ഉണ്ടായത്. കങ്കണയെ മര്ദിച്ചതിന് കുല്വീന്ദര് കൗറിനെതിരെ കേസെടുക്കുകയും സസ്പെന്ഡ് ചെയ്യുകയും ചെയ്തിരുന്നു. സെക്യൂരിറ്റി ചെക്കിങിനിടെയാണ് തന്നെ മര്ദിച്ചതെന്നും തന്നെ കാത്തുനിന്ന് മര്ദിക്കുകയായിരുന്നുവെന്നുമാണ് സംഭവത്തെ കുറിച്ച് കങ്കണ പറഞ്ഞിരുന്നത്. പഞ്ചാബില് തീവ്രവാദം വര്ധിക്കുകയാണെന്ന് കങ്കണ ആരോപിച്ചിരുന്നു.
എന്നാല്, കര്ഷക സമരം സംബന്ധിച്ച് കങ്കണ മുമ്പ് നടത്തിയ പരാമര്ശമാണ് തന്നെ ചൊടിപ്പിച്ചതെന്നും കര്ഷകരെ അധിക്ഷേപിച്ചതിനോടാണ് താന് പ്രതികരിച്ചതെന്നും കുല്വിന്ദര് കൗറും പ്രതികരിച്ചു. 'നൂറ് രൂപ കിട്ടാനാണ് കര്ഷകര് അവിടെ പോയിരിക്കുന്നതെന്നാണ് കങ്കണ അന്ന് പറഞ്ഞത്.
അവര് പോയി അവിടെ ഇരിക്കുമോ? അവര് ഈ പ്രതികരണം നടത്തുമ്പോള് എന്റെ അമ്മയും കര്ഷകര്ക്കൊപ്പം സമരത്തിലായിരുന്നു'- എന്നായിരുന്നു കുല്വീന്ദര് കൗര് വിശദീകരിച്ചത്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."