തെല്‍ അവീവ്: ഗസ്സയിലെ അധിനിവേശത്തില്‍ നിന്നും പിന്നോട്ടില്ലെന്ന നിലപാടില്‍ ഉറച്ചുനില്‍ക്കുന്ന നെതന്യാഹു ഭരണകൂടത്തിനെതിരെ ഇസ്‌റാഈല്‍ തെരുവുകളില്‍ പ്രതിഷേധമിരമ്പുന്നു. യുദ്ധം അവസാനിപ്പിക്കണമെന്നാവശ്യപ്പെട്ട് നടക്കുന്ന പ്രതിഷേധങ്ങള്‍ അക്ഷരാര്‍ഥത്തില്‍ നെതന്യാഹു ഭരണകൂടത്തെ വലച്ചിരിക്കുകയാണ്.  

ഗസ്സയിലെ യുദ്ധം ഉടന്‍ അവസാനിപ്പിക്കണമെന്നാവശ്യപ്പെട്ട് കഴിഞ്ഞ ദിവസം തെല്‍ അവീവില്‍ നടന്ന റാലിയില്‍ പതിനായിരങ്ങളാണ് പങ്കെടുത്തത്. യുദ്ധം അവസാനിപ്പിക്കണം, ഹമാസ് ബന്ദികളാക്കിയവരെ തിരിച്ചെത്തിക്കണം, പുതിയ തെരഞ്ഞെടുപ്പ് നടത്തണം എന്നിവയാണ് പ്രതിഷേധക്കാരുടെ പ്രധാന ആവശ്യങ്ങള്‍. നെതന്യാഹുവിനെ ക്രൈം മിനിസ്റ്റര്‍ എന്നാണ് പ്രതിഷേധക്കാര്‍ വിശേഷിപ്പിച്ചത്. 

യുദ്ധം അവസാനിപ്പിക്കണമെന്ന ബാനറുകളും റാലിയിലുയര്‍ത്തി. ഡെമോക്രസി സ്വകയറില്‍ ചുവന്ന പൊയിന്റടിച്ചു.  നെതന്യാഹുവിന്റെ ഭരണത്തിന് കീഴില്‍ രാജ്യത്തെ ജനാധിപത്യം മരിച്ചുവെന്ന് പറഞ്ഞായിരുന്നു ഇത്. ഇസ്‌റാഈല്‍ കണ്ട ഏറ്റവും വലിയ പ്രതിഷേധ പ്രക്ഷോഭങ്ങളിലൊന്നായിരുന്നു കഴിഞ്ഞ ദിവസം നടന്നത്.