വടക്കാഞ്ചേരി: ആകാശവാണിയുടെ വയലും, വീടും പരിപാടി സംപ്രേക്ഷണത്തിന്റെ  50-ാം വാര്‍ഷികം ആഘോഷിച്ചു. റേഡിയോ ഒരുതരംഗമായി നിലനിന്നിരുന്ന കാലഘട്ടത്തില്‍ കേരളത്തിലെ സ്വീകരണമുറികളില്‍ നിന്ന് ഉയര്‍ന്നു കേട്ടിരുന്ന പരിപാടിയാണ് വയലും വീടും. രാജ്യത്തിന്റെ ഭക്ഷ്യ സുരക്ഷക്കായി ആകാശവാണി ഏറ്റെടുത്ത് വിജയകരമായി പൂര്‍ത്തിയാക്കിയ വിഞ്ജാന വ്യാപന ദൗത്യം മാധ്യമ ചരിത്രത്തില്‍ തന്നെ ഇടം പിടിച്ച ശ്രദ്ധേയമായ പരിപാടിയായിരുന്നു. പ്രക്ഷേപണത്തിന്റെ അമ്പതാം വാര്‍ഷികാഘോഷങ്ങളുടെ ഭാഗമായി ആകാശവാണി നിലയങ്ങളുടെ നേതൃത്വത്തില്‍ വിപുലമായ പരിപാടികളാണ് നടന്ന് വരുന്നത്. എല്ലാ ജില്ലകളിലും കാര്‍ഷിക പ്രശ്‌നോത്തരിയും സംഘടിപ്പിച്ചിട്ടുണ്ട്. ജില്ലാതല മത്സരങ്ങളില്‍ ഒന്നാം സ്ഥാനം നേടുന്ന ടീമുകളെ ഉള്‍പ്പെടുത്തി സംസ്ഥാന തല മത്സരം നടത്തും. തൃശൂര്‍ ജില്ലാ തല മത്സരം വടക്കാഞ്ചേരി നഗരസഭ അതിര്‍ത്തിയില്‍ നടന്നു. ഇന്നലെ അത്താണി പെരിങ്ങണ്ടൂര്‍ സര്‍വീസ് സഹകരണ ബാങ്ക് ഹാളിലാണ് പ്രശ്‌നോത്തരി നടന്നത്. ജില്ലയിലെ ഓരോ കൃഷി അസിസ്റ്റന്റ് ഡയറക്ടര്‍ ഓഫിസ് പരിധിയിലുള്ള രണ്ടു കര്‍ഷകര്‍ വീതമുള്ള ടീമാണ് മത്സരത്തില്‍ പങ്കെടുത്തത്. ഇരിങ്ങാലക്കുട ബ്ലോക്കിനാണ് ഒന്നാം സ്ഥാനം. ചൊവ്വന്നൂര്‍ ബ്ലോക്ക് രണ്ടാം സ്ഥാനവും, പഴയന്നൂര്‍ ബ്ലോക്ക് മൂന്നാം സ്ഥാനവും നേടി വിജയികള്‍ക്ക റേഡിയോ സമ്മാനമായി നല്‍കി. തുടര്‍ന്ന് കര്‍ഷക സംഘം മുതിര്‍ന്ന കര്‍ഷകന്‍ രാജന്‍ വാലത്തിന് ജൈവ പച്ചക്കറികള്‍ നല്‍കി. കാര്‍ഷിക സര്‍വകലാശാല വൈസ് ചാന്‍സലര്‍ ഡോ. പി.രാജേന്ദ്രന്‍ നിര്‍വഹിച്ചു. വടക്കാഞ്ചേരി നഗരസഭ വൈസ് ചെയര്‍മാന്‍ എം.ആര്‍ അനൂപ് കിഷോര്‍ ആമുഖ പ്രഭാഷണം നടത്തി. ആകാശവാണി തൃശൂര്‍ നിലയം പ്രോഗ്രാം മേധാവി കെ.ആര്‍ ഇന്ദിര അധ്യക്ഷയായി. ഡോ:  എസ്.എസ്റ്റലീറ്റ, എ.എ പ്രസാദ്, വി.എസ് റോയ്, എം.ആര്‍ ഷാജന്‍,ജോസഫ് ജോണ്‍ തേറാട്ടില്‍, ഡോ: എസ്.കൃഷ്ണന്‍ എന്നിവര്‍ പ്രസംഗിച്ചു. എസ്.നാരായണന്‍ നമ്പൂതിരി സ്വാഗതവും, അനിത വര്‍മ്മ നന്ദിയും പറഞ്ഞു. മുഖാമുഖവും നടന്നു. ആറങ്ങോട്ടുകര വയലി നാട്ടറിവ് പഠന കേന്ദ്രത്തിന്റെ നാടന്‍ പാട്ടുകളും ഉണ്ടായി.
ഫോട്ടോ  ആകാശവാണി വയലും വീടും ആഘോഷ പരിപാടിയുടെ ഭാഗമായുള്ള ക്വിസ് മത്സരത്തില്‍ വിജയിച്ചവര്‍ക്കുള്ള സമ്മാന വിതരണം.