തിരുവനന്തപുരം: പ്ലസ് വൺ പ്രവേശനം നേടിയവർക്ക് സ്‌കൂളും വിഷയവും മാറാൻ ഇന്നുകൂടി അവസരം. ഏകജാലകം വഴി മെറിറ്റിൽ പ്ലസ് വൺ പ്രവേശനം നേടിയവർക്കാണ് ക്യാൻഡിഡേറ്റ് ലോഗ് ഇൻ വഴി (www.hscap.kerala.gov.in)സ്‌കൂളും വിഷയവും മാറാൻ ഇന്ന് ഉച്ചയ്ക്ക് രണ്ടുവരെ അവസരമുള്ളത്. പ്രവേശനം ലഭിച്ച ജില്ലക്കുള്ളിൽ മാത്രമേ മാറ്റത്തിന് അപേക്ഷിക്കാനാകൂ. പ്രവേശനം ലഭിച്ച സ്‌കൂളിൽ വേറെ വിഷയം തിരഞ്ഞെടുക്കുകയോ മറ്റൊരു സ്‌കൂളിൽ അതേ വിഷയമോ മറ്റൊന്നോ തിരഞ്ഞെടുക്കുകയുമാകാം. സ്‌കൂളും വിഷയവും മാറാൻ എത്ര ഓപ്ഷനുകളും നൽകാനാകും. സീറ്റ് ഒഴിവുകൾ സൈറ്റിലുണ്ട്.

ആദ്യ സപ്ലിമെന്ററി അലോട്ട്‌മെന്റിനുശേഷമുള്ള സീറ്റുകളിലും കാസർകോട്, മലപ്പുറം ജില്ലകളിൽ അധികമായി അനുവദിച്ച 138 താൽക്കാലിക ബാച്ചുകളിലുമാണ് സ്‌കൂൾ മാറ്റത്തിന് അപേക്ഷിക്കാവുന്നത്. സീറ്റ് ഒഴിവില്ലാത്ത സ്‌കൂളുകളിലേക്കും വിഷയങ്ങളിലേക്കും അപേക്ഷിക്കാമെങ്കിലും ഒഴിവ് അനുസരിച്ചു മാത്രമേ പരിഗണിക്കൂ. മാറ്റം ലഭിച്ചാൽ പുതിയ സ്‌കൂളിൽ പഠിക്കേണ്ടത് നിർബന്ധമാണ്.

Plus One: Today Only Chance to Change Schools and Subjects