ന്യൂഡൽഹി: യു.പി.എസ്‌.സി (യൂണിയൻ പബ്ലിക് സർവീസ് കമ്മിഷൻ) ചെയർമാൻ മനോജ് സോണി രാജിവെച്ചു. സേവന കാലാവധി 2029 മെയ് വരെ നിൽക്കെയാണ് അദ്ദേഹത്തിന്റെ പെട്ടന്നുള്ള രാജി. വ്യക്തിപരമായ കാരണങ്ങളാൽ രാജിവെച്ചെന്നാണ് ഔദ്യോഗിക വൃത്തങ്ങൾ അറിയിക്കുന്നത്. പ്രൊബേഷണറി ഐ.എ.എസ് ഓഫീസർ പൂജ ഖേദ്കർ വ്യജ രേഖ സമർപ്പിച്ചതുമായി ബന്ധപ്പെട്ടുള്ള വിവാദങ്ങളുമായും ആരോപണങ്ങളുമായും അദ്ദേഹത്തിൻ്റെ രാജി ഒരു തരത്തിലും ബന്ധപ്പെട്ടിട്ടില്ലെന്ന് വൃത്തങ്ങൾ പറഞ്ഞു.

രണ്ടാഴ്ച മുമ്പ് വ്യക്തിപരമായ കാരണങ്ങളാൽ യു.പി.എസ്‌.സി ചെയർമാൻ രാജി സമർപ്പിച്ചിരുന്നതായും എന്നാൽ ഇത് ഇനിയും അംഗീകരിക്കപ്പെട്ടിട്ടില്ലെന്നുമാണ് പുറത്തുവരുന്ന വിവരം. 

2017 ജൂൺ 28- നാണ് കമ്മിഷൻ അംഗമായി മനോജ് സോണി ചുമതലയേറ്റത്. 2023 മെയ് 16-നാണ് കമ്മിഷന്റെ ചെയർമാനായി അധികാരമേറ്റത്. 2029 മെയ് 15 വരെയായിരുന്നു കാലാവധി. ഗുജറാത്തിൽ നിന്നുള്ള മനോജ് സോണി മുൻപ് രണ്ട് സർവകലാശാലകളിലായി മൂന്ന് തവണ വൈസ് ചാൻസലറായി സേവനം ചെയ്തിട്ടുണ്ട്.

അതേസമയം, സിവിൽ സർവിസിൽ കയറാൻ വ്യാജരേഖ ചമച്ചതിന് പൂജ ഖേദ്കറിനെതിരെ ക്രിമിനൽ കേസ് ഫയൽ ചെയ്തിട്ടുണ്ടെന്നും ഭാവിയിലെ തിരഞ്ഞെടുപ്പുകളിൽ നിന്ന് അവരെ വിലക്കാനുള്ള നടപടികൾ സ്വീകരിച്ചിട്ടുണ്ടെന്നും യു.പി.എസ്‌.സി വെള്ളിയാഴ്ച വ്യക്തമാക്കിയിരുന്നു. വ്യാജ രേഖ ചമച്ച് പൂജ ഖേദ്കർ സിവിൽ സർവീസ് നേടിയതിന് പിന്നാലെ, ഇന്ത്യൻ അഡ്മിനിസ്‌ട്രേറ്റീവ് സർവീസ് (ഐഎഎസ്), ഇന്ത്യൻ പൊലിസ് സർവീസ് (ഐപിഎസ്) ഉദ്യോഗസ്ഥർ ഉൾപ്പെടെയുള്ളവർ വ്യാജ സർട്ടിഫിക്കറ്റുകൾ ഉപയോഗിച്ചതുമായി ബന്ധപ്പെട്ട നിരവധി ആരോപണങ്ങൾ ഉയർന്നിരുന്നു. 

മറ്റ് പിന്നാക്ക വിഭാഗത്തിലും (നോൺ ക്രീമി ലെയർ) സാമ്പത്തികമായി പിന്നാക്കം നിൽക്കുന്ന വിഭാഗങ്ങളിലും (ഇഡബ്ല്യുഎസ്) ലഭ്യമായ ആനുകൂല്യങ്ങൾ ലഭിക്കാൻ വ്യാജ സർട്ടിഫിക്കറ്റുകൾ ഉപയോഗിച്ചെന്ന് ആരോപണമുള്ള ഏതാനും ഐഎഎസ്, ഐപിഎസ് ഉദ്യോഗസ്ഥരുടെ പേരും ചിത്രങ്ങളും മറ്റ് വിശദാംശങ്ങളും സമൂഹ മാധ്യമങ്ങളിൽ പ്രചരിച്ചിരുന്നു. ഈ സാഹചര്യത്തിൽ കൂടിയാണ് യു.പി.എസ്‌.സി ചെയർമാൻ മനോജ് സോണി രാജിവെച്ചത് എന്നത് ശ്രദ്ധേയമാണ്.