കുന്നുംകൈ: പെരുമ്പട്ട ഗവ. എല്‍.പി സ്‌കൂള്‍ കെട്ടിടം അപകടാവസ്ഥയില്‍. എപ്പോഴും തകര്‍ന്നുവീഴാന്‍ സാധ്യതയുള്ള കെട്ടിടത്തിലാണ് ഇപ്പോള്‍ അധ്യയനം നടക്കുന്നത്. ഇതുകാരണം വിദ്യാര്‍ഥികളും രക്ഷിതാക്കളും അപകട ഭീതിയിലാണ്. 1992 ല്‍ സ്ഥാപിച്ച കെട്ടിടം ചോര്‍ന്നൊലിച്ചു ജീര്‍ണാവസ്ഥയിലായിരിക്കുകയാണ്. സ്‌കൂളിന്റെ പിറകുവശത്തെ കൂറ്റന്‍ മണ്‍കൂന ഏതുനിമിഷവും ഇടിഞ്ഞു വീഴാനും സാധ്യതയുണ്ട്. സ്‌കൂള്‍ തുടങ്ങിയതു മുതല്‍ ഇതുവരെ ഒരു അറ്റകുറ്റപ്പണികളും നടത്തിയില്ലെന്ന് നാട്ടുകാര്‍ പറയുന്നു. മഴവെള്ളം കെട്ടിടത്തിലേക്ക് പതിക്കുന്നതിനാല്‍ ചുമരുകള്‍ക്ക് ബലക്ഷയം സംഭവിച്ച് നിലംപൊത്താറായിരിക്കുകയാണ്. കെട്ടിടത്തിലെ അപകടാവസ്ഥ മാറ്റി തങ്ങളുടെ ആശങ്ക അകറ്റണമെന്നാണ് അധ്യാപകരും രക്ഷാകര്‍ത്താക്കളും പറയുന്നത്.