ന്യൂഡല്‍ഹി: രണ്ടു ദിവസത്തെ സന്ദര്‍ശനത്തിനായി ഇന്ത്യയിലെത്തിയ ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍താനിയെ പ്രധാനമന്ത്രി നരേന്ദ്ര മോദി നേരിട്ടെത്തി സ്വീകരിച്ചു. പ്രോട്ടോക്കോള്‍ മാറ്റിവെച്ചാണ് മോദി ഡല്‍ഹി വിമാനത്താവളത്തില്‍ എത്തി ഖത്തര്‍ അമീറിെന സ്വീകരിച്ചത്.

ആലിംഗനം ചെയ്ത് പരസ്പരം സംസാരിച്ച ഇരു നേതാക്കളും ഊഷ്മളമായ ബന്ധം പുതുക്കികൊണ്ട് വിമാനത്താവളത്തില്‍ ഒരുക്കിയിരുന്ന കലാപ്രകടനം വീക്ഷിക്കുകയും ചെയ്തു. വിദേശകാര്യ മന്ത്രി എസ് ജയശങ്കറും അദ്ദേഹത്തെ സ്വീകരിക്കാന്‍ സ്ഥലത്തെത്തിയിരുന്നു. എക്‌സില്‍ കുറിച്ച ഒരു പോസ്റ്റില്‍, മോദി ഖത്തര്‍ അമീറിന് ഇന്ത്യയില്‍ മികച്ച താമസം ആശംസിച്ചു.

'എന്റെ സഹോദരന്‍, ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍ താനിയെ സ്വാഗതം ചെയ്യാന്‍ വിമാനത്താവളത്തില്‍ പോയി. അദ്ദേഹത്തിന് ഇന്ത്യയില്‍ ഫലവത്തായ താമസം ആശംസിക്കുന്നു, നാളത്തെ നമ്മുടെ കൂടിക്കാഴ്ചയ്ക്കായി കാത്തിരിക്കുന്നു,' അദ്ദേഹം എഴുതി.

ഇന്ത്യ സന്ദര്‍ശിക്കുന്ന ഹമദ് അല്‍താനി ചൊവ്വാഴ്ച പ്രസിഡന്റ് ദ്രൗപതി മുര്‍മുവിനെ കാണുകയും പ്രധാനമന്ത്രി മോദിയുമായി ചര്‍ച്ച നടത്തുകയും ചെയ്യും. പ്രധാനമന്ത്രി മോദിയുടെ ക്ഷണപ്രകാരമാണ് അദ്ദേഹത്തിന്റെ രണ്ട് ദിവസത്തെ സന്ദര്‍ശനം. ഖത്തര്‍ അമീറിന്റെ രണ്ടാമത്തെ ഇന്ത്യാ സന്ദര്‍ശനമാണിത്. നേരത്തേ 2015 മാര്‍ച്ചില്‍ അദ്ദേഹം ഇന്ത്യ സന്ദര്‍ശിച്ചിരുന്നു.

വിദേശകാര്യ മന്ത്രാലയം പറയുന്നതനുസരിച്ച്, അദ്ദേഹത്തിന്റെ സന്ദര്‍ശനം വളര്‍ന്നുവരുന്ന നമ്മുടെ ബഹുമുഖ പങ്കാളിത്തത്തിന് കൂടുതല്‍ ആക്കം കൂട്ടുമെന്നാണ്. മന്ത്രിമാര്‍, മുതിര്‍ന്ന ഉദ്യോഗസ്ഥര്‍, ബിസിനസ് പ്രതിനിധി സംഘം എന്നിവരുള്‍പ്പെടെ ഒരു ഉന്നതതല പ്രതിനിധി സംഘം അദ്ദേഹത്തോടൊപ്പം ഉണ്ടാകുമെന്ന് വിദേശകാര്യ മന്ത്രാലയത്തിന്റെ പ്രസ്താവനയില്‍ പറയുന്നു.

തിങ്കളാഴ്ച വൈകുന്നേരം വിദേശകാര്യ മന്ത്രി ജയശങ്കര്‍ അല്‍താനിയെ സന്ദര്‍ശിക്കും. ചൊവ്വാഴ്ച രാവിലെ, ഖത്തര്‍ അമീറിന് രാഷ്ട്രപതി ഭവന്റെ മുന്‍വശത്ത് വലിയ സ്വീകരണം ഒരുക്കും. തുടര്‍ന്ന് ഹൈദരാബാദ് ഹൗസില്‍ പ്രധാനമന്ത്രി മോദിയുമായുള്ള കൂടിക്കാഴ്ച നടക്കും.

പ്രധാനമന്ത്രി മോദിയുമായി അദ്ദേഹം ചര്‍ച്ച നടത്തുമെന്നും ഉഭയകക്ഷി ബന്ധത്തിന്റെ വിവിധ വശങ്ങള്‍ ചര്‍ച്ചയാകുമെന്നും വിദേശകാര്യ മന്ത്രാലയം ശനിയാഴ്ച പ്രസ്താവനയില്‍ അറിയിച്ചിരുന്നു. ചൊവ്വാഴ്ച ഉച്ചകഴിഞ്ഞ് ധാരണാപത്രങ്ങളുടെ കൈമാറ്റം നടക്കും. അതിനുശേഷം ഖത്തര്‍ അമീര്‍ പ്രസിഡന്റ് ദ്രൗപതി മുര്‍മുവുമായി കൂടിക്കാഴ്ച നടത്തും.

ഖത്തറിലെ ഏറ്റവും വലിയ പ്രവാസി സമൂഹമാണ് ഖത്തറില്‍ താമസിക്കുന്ന ഇന്ത്യന്‍ സമൂഹം, ഖത്തറിന്റെ പുരോഗതിയിലും വികസനത്തിലും അവര്‍ നല്‍കുന്ന നല്ല സംഭാവനകള്‍ക്ക് അഭിനന്ദനം അര്‍ഹിക്കുന്നു എന്ന് വിദേശകാര്യ മന്ത്രാലയം നേരത്തെ പറഞ്ഞിരുന്നു.