തിരുവനതപുരം: ഉത്സവ ആഘോഷങ്ങളിൽ ദീപാലങ്കാരം നടത്തുമ്പോൾ ശ്രദ്ധിക്കേണ്ട ജാഗ്രത നിർദ്ദേശങ്ങളുമായി കെഎസ്ഇബി. തങ്ങളുടെ ഫെയ്‌സ്‌ബുക്ക്‌ പേജിലൂടെയാണ് കെഎസ്ഇബി നിർദ്ദേശങ്ങൾ നൽകിയത്. ഗുണമേന്മ കുറഞ്ഞ പ്ലാസ്റ്റിക് ഇൻസുലേറ്റഡ് വയറുകളും മറ്റ് അനുബന്ധ ഉപകരണങ്ങൾ ഉപയോഗിക്കുന്നത് അപകടം സൃഷ്ടിക്കുമെന്നും ലോഹം കൊണ്ട് നിർമ്മിച്ച പ്രതലങ്ങളിൽ സുരക്ഷ മാനദണ്ഡങ്ങൾ പാലിച്ചുകൊണ്ട് ദീപാലങ്കാരം നടത്തണമെന്നുമാണ് കെഎസ്ഇബി അറിയിച്ചത്. 

വയറിൽ മൊട്ടുസൂചി,സേഫ്റ്റി പിൻ എന്നിവ ഉപയോഗിച്ചുകൊണ്ട് കണക്ഷനെടുക്കുന്നതും വയർ ജോയിന്റുകൾ ശരിയായ തരത്തിൽ ഇൻസുലേറ്റ് ചെയ്യാതിരിക്കുന്നതും അപകടത്തിലേക്ക് നയിക്കുമെന്നും കെഎസ്ഇബി വ്യക്തമാക്കി. അലങ്കാര പ്രവർത്തനങ്ങൾ നടത്തുന്നതിന് മുമ്പായി അതത് സെക്ഷൻ ഓഫീസിൽ നിന്നും നേരത്തെ അനുവാദം വാങ്ങണമെന്നും ഇലക്ട്രിക്കൽ ഇൻസ്‌പെക്ടറേറ്റിന്റെ അംഗീകാരമുള്ള കോൺട്രാക്ടറെ മാത്രമാണ് ഈ പ്രവർത്തനങ്ങൾക്ക് ചുമതല ഏൽപ്പിക്കാവൂ എന്നും കെഎസ്ഇബിയുടെ ജാഗ്രത നിർദ്ദേശങ്ങളിൽ പറയുന്നുണ്ട്. 

കെഎസ്ഇബിയുടെ ഫെയ്‌സ്‌ബുക്ക്‌ പോസ്റ്റ്

ഉത്സവാഘോഷങ്ങളുടെ ഭാഗമായി ദീപാലങ്കാരം നടത്തുമ്പോൾ തികഞ്ഞ ജാഗ്രത വേണം. 

ഗുണമേന്മ കുറഞ്ഞ പ്ലാസ്റ്റിക് ഇൻസുലേറ്റഡ് വയറുകളും അനുബന്ധ ഉപകരണങ്ങളും ഉപയോഗിക്കുന്നത് അപകടം ക്ഷണിച്ചുവരുത്തും.

ലോഹനിർമ്മിതമായ പ്രതലങ്ങളിൽ സുരക്ഷാ മാനദണ്ഡങ്ങൾ പാലിച്ചുമാത്രമേ ദീപാലങ്കാരം നടത്താവൂ. 

വയറിൽ മൊട്ടുസൂചി/സേഫ്റ്റി പിൻ കുത്തി കണക്ഷനെടുക്കുന്നതും വയർ ജോയിന്റുകൾ ശരിയായ തരത്തിൽ ഇൻസുലേറ്റ് ചെയ്യാതിരിക്കുന്നതും അപകടകരമാണ്.

കെഎസ്ഇബിയുടെ വൈദ്യുത പ്രതിഷ്ഠാപനങ്ങൾക്ക് സമീപം അലങ്കാര പ്രവർത്തനങ്ങൾ നടത്തുന്നതിനുമുമ്പ് അതത് സെക്ഷൻ ഓഫീസിൽ നിന്ന് അനുവാദം വാങ്ങേണ്ടതുണ്ട്. 

ഇലക്ട്രിക്കൽ ഇൻസ്പെക്ടറേറ്റിൻ്റെ അംഗീകാരമുള്ള കോൺട്രാക്ടറെ മാത്രമേ ദീപാലങ്കാര പ്രവൃത്തികൾക്ക് ചുമതലപ്പെടുത്താവൂ.