ദുബൈ: ഫെബ്രുവരി 20 വ്യാഴാഴ്ച വരെ സഊദി അറേബ്യയുടെ വിവിധ പ്രദേശങ്ങളില്‍ കനത്ത മഴ തുടരുമെന്ന് സൗദി നാഷണല്‍ സെന്റര്‍ ഓഫ് മെറ്റീരിയോളജി (എന്‍സിഎം) അറിയിച്ചു. റിയാദ്, ഹായില്‍, അല്‍ ഖാസിം, കിഴക്കന്‍ പ്രവിശ്യ, വടക്കന്‍ അതിര്‍ത്തികള്‍, മക്ക, മദീന എന്നിവിടങ്ങളില്‍ മഴ തുടരുമെന്നും എന്‍സിഎം അറിയിച്ചു.

മക്ക മേഖലയില്‍ മണല്‍ കാറ്റിനൊപ്പം മിതമായ തോതിലുള്ള മഴയ്ക്കും വെള്ളപ്പൊക്കത്തിനും സാധ്യതയുണ്ടെന്നും തായിഫ്, മെയ്‌സാന്‍, അദം, അല്‍ അര്‍ദിയത്ത്, അല്‍ മുവൈഹ്, ഖുര്‍മ, റാണിയ്യ, തുറൂബ, ബഹ്‌റ, അല്‍ ജുമും, ഖുലൈസ്, അല്‍ കാമില്‍ എന്നീ ഗവര്‍ണറേറ്റുകളില്‍ ആലിപ്പഴ വര്‍ഷത്തിനും സാധ്യതയുണ്ടെന്നും എന്‍സിഎം സൂചിപ്പിച്ചു.

അല്‍ ബഹയിലെ മിക്ക ഗവര്‍ണറേറ്റുകളിലും ചൊവ്വാഴ്ച വരെ നേരിയ മഴ ലഭിക്കുമെന്നാണ് പ്രതീക്ഷിക്കുന്നത്. അതേസമയം റിയാദ്, അല്‍ ഖാസിം, ഹായില്‍, നജ്‌റാന്‍, കിഴക്കന്‍ പ്രവിശ്യ, മദീന, വടക്കന്‍ അതിര്‍ത്തികള്‍, അല്‍ ജാഫ് എന്നിവിടങ്ങളിലും സമാനമായ കാലാവസ്ഥയുണ്ടാകുമെന്നാണ് കരുതുന്നത്. ഇതിനുപുറമേ മണല്‍ക്കാറ്റിനും സാധ്യതയുണ്ട്.

കാലാവസ്ഥയെയും ദുരിതബാധിത പ്രദേശങ്ങളെയും കുറിച്ചുള്ള അപ്‌ഡേറ്റുകള്‍ക്കായി തങ്ങളുടെ ആശയവിനിമയ മാര്‍ഗങ്ങള്‍ പിന്തുടരാന്‍ എന്‍സിഎം പൊതുജനങ്ങളോട് അഭ്യര്‍ത്ഥിച്ചു. ബന്ധപ്പെട്ട അധികാരികളുടെ നിര്‍ദ്ദേശങ്ങള്‍ പാലിക്കാനും കാലാവസ്ഥാ നിരീക്ഷണ വകുപ്പ് നിര്‍ദ്ദേശിച്ചു.

ജിദ്ദ, ഷുഐബ, അല്‍ ലീത്ത് എന്നിവിടങ്ങളില്‍ മണിക്കൂറില്‍ 40-49 കിലോമീറ്റര്‍ വേഗതയില്‍ ശക്തമായ കാറ്റ് വീശുമെന്നും ഇതിനാല്‍ ദൃശ്യപരത കുറയാനും കടല്‍ പ്രക്ഷുബ്ധമാകാനും സാധ്യതയുണ്ടെന്നും ഇത് സമുദ്ര ഗതാഗതത്തെ ബാധിക്കുമെന്നും മറ്റൊരു റിപ്പോര്‍ട്ടില്‍ കേന്ദ്രം മുന്നറിയിപ്പ് നല്‍കി. ഈ പ്രദേശങ്ങളില്‍ ഇന്ന് രാവിലെ 9 മുതല്‍ രാത്രി 11 വരെ മുന്നറിയിപ്പ് പ്രാബല്യത്തില്‍ ഉണ്ടാകും.

ജിദ്ദ ഉള്‍പ്പെടെയുള്ള മക്കയുടെ ചില ഭാഗങ്ങളില്‍ ഉച്ചയ്ക്ക് 1 മണി മുതല്‍ രാത്രി 9 മണി വരെ കാറ്റും മഴയും ഉണ്ടാകുമെന്നാണ് പ്രവചിക്കപ്പെടുന്നത്. അതേസമയം സിയേല്‍, വാദി അല്‍ ദവാസിര്‍ തുടങ്ങിയ പ്രദേശങ്ങള്‍ ഉള്‍പ്പെടെയുള്ള റിയാദില്‍ ഉച്ചകഴിഞ്ഞ് 3 മണി മുതല്‍ രാത്രി 11:00 വരെ ഇടിമിന്നലോടെയുള്ള മഴ ഉണ്ടാകാനിടയുണ്ട്.

വാഹനമോടിക്കുമ്പോള്‍ ജാഗ്രത പാലിക്കാനും, വെള്ളപ്പൊക്ക സാധ്യതയുള്ള പ്രദേശങ്ങള്‍ ഒഴിവാക്കാനും, സുരക്ഷ ഉറപ്പാക്കാന്‍ ഔദ്യോഗിക ഉറവിടങ്ങളില്‍ നിന്നുള്ള വിവരങ്ങള്‍ പിന്തുടരാനും കേന്ദ്രം എല്ലാവരോടും ആവശ്യപ്പെട്ടു.