ധാക്ക: ജനകീയ പ്രക്ഷോഭവും പ്രധാനമന്ത്രി രാജിവച്ച് നാടുവിട്ടതുമൂലവും അരക്ഷിതാവസ്ഥ നിലനിൽക്കുന്ന ബംഗ്ലാദേശിൽ നൊബേൽ ജേതാവായ മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സർക്കാർ ഇന്ന് അധികാരമേൽക്കും. 15 അംഗ ഉപദേശകസമിതിയാകും വൈകിട്ട് സത്യപ്രതിജ്ഞ ചൊല്ലുകയെന്ന് പ്രധാനമന്ത്രി ഷെയ്ഖ് ഹസീന രാജിവച്ചതിനെത്തുടർന്ന് ഇടക്കാലഭരണത്തിന്റെ ചുമതലയുള്ള സൈനികമേധാവി ജനറൽ വഖാറുസ്സമാൻ പറഞ്ഞു.

ഫ്രഞ്ച് സന്ദർശനത്തിലായിരുന്ന യൂനുസ് നാട്ടിലേക്ക് തിരിച്ചു. 84 കാരനായ യൂനുസിനെ കഴിഞ്ഞദിവസം പ്രസിഡന്റ് ഇടക്കാല പ്രധാനമന്ത്രിയായി തെരഞ്ഞെടുത്തിരുന്നു. 

ബംഗ്ലാദേശ് പ്രസിഡന്റ് മുഹമ്മദ് ഷഹാബുദ്ദീന്റെ പ്രസ് സെക്രട്ടറി ജോയ്നൽ അബേദിൻ ആണ് ഇടക്കാല സർക്കാരിന്റെ തലവനെ തെരഞ്ഞെടുത്ത വിവരം ഔദ്യോഗികമായി പ്രഖ്യാപിച്ചത്. വിദ്യാർഥി പ്രതിഷേധത്തിന് നേതൃത്വം നൽകിയവർ, രാജ്യത്തെ മൂന്ന് സൈനിക വിഭാഗങ്ങളുടെ മേധാവികൾ, സിവിൽ സൊസൈറ്റി അംഗങ്ങൾ, വ്യവസായികൾ എന്നിവർ പ്രസിഡന്റുമായി നടത്തിയ കൂടിക്കാഴ്ചയ്ക്ക് പിന്നാലെയാണ് പ്രഖ്യാപനം നടത്തിയത്. 

ഇടക്കാല സർക്കാരിനെ നയിക്കാൻ തയ്യാറാണെന്ന് മുഹമ്മദ് യൂനുസ് അറിയിച്ചു. പ്രക്ഷോഭകർ അർപ്പിച്ച വിശ്വാസത്തിലൂടെ താൻ ആദരിക്കപ്പെട്ടതായും അദ്ദേഹം പറഞ്ഞു. ഇത് പ്രധാനപ്പെട്ട ഒരു ചുവടാണെന്ന് പറഞ്ഞ മുഹമ്മദ് യൂനുസ്, ഇടക്കാല സർക്കാർ ഒരു തുടക്കം മാത്രമാണ് എന്നും അറിയിച്ചു. രാജ്യത്ത് സ്വതന്ത്രമായ തെരഞ്ഞെടുപ്പ് നടക്കണമെന്നും സ്വതന്ത്രമായ തെരഞ്ഞെടുപ്പിലൂടെ മാത്രമേ നീണ്ടുനിൽക്കുന്ന സമാധാനം രാജ്യത്ത് കൈവരികയുള്ളൂ എന്നും അദ്ദേഹം വ്യക്തമാക്കി.