നെടുമ്പാശേരി: സുരക്ഷാ പരിശോധനയ്ക്കിടെ ലഗേജില്‍ ബോംബുണ്ടെന്ന് പറഞ്ഞ് യാത്രക്കാരന്‍. ഇതേത്തുടര്‍ന്ന് വിമാനം വൈകിയത് രണ്ട് മണിക്കൂര്‍. ഇന്നലെ പുലര്‍ച്ചെ തായ് എയര്‍ലൈന്‍സ് വിമാനത്തില്‍ തായ്‌ലന്റിലേക്ക് പോകാനെത്തിയ തിരുവനന്തപുരം സ്വദേശി പ്രശാന്താണ് 'തമാശ ബോംബ് ' പൊട്ടിച്ച് പിടിയിലായത്. 

ആഫ്രിക്കയില്‍ ബിസിനസുകാരനായ ഇയാള്‍ ഭാര്യയും മകനും മറ്റു നാലുപേരോടുമൊപ്പമാണ് തായ്‌ലന്റിലേക്ക് പോകാനെത്തിയത്. ബാഗേജ് പരിശോധന നീണ്ടപ്പോഴാണ് ബാഗില്‍ ബോംബാണെന്ന് ഇയാള്‍ പറഞ്ഞത്. രണ്ടു തവണ ഇത് ആവര്‍ത്തിച്ചതോടെ ഉദ്യോഗസ്ഥര്‍ സുരക്ഷാ വിഭാഗത്തിന് റിപ്പോര്‍ട്ട് ചെയ്യുകയായിരുന്നു. ഇതോടെ  ബോംബ് ഉണ്ടെന്ന് പറഞ്ഞത് തമാശയായിട്ടാണെന്ന് ഇയാള്‍ പറഞ്ഞെങ്കിലും നടപടികള്‍ പൂര്‍ത്തിയാക്കി നെടുമ്പാശേരി പൊലിസിന് കൈമാറുകയായിരുന്നു.

ഇയാളുടെ യാത്ര തടഞ്ഞതോടെ ഭാര്യയും മകനും യാത്ര ചെയ്യാനില്ലെന്നറിയിച്ചു. കൂടെയുണ്ടായിരുന്നവരുടെയും ടിക്കറ്റുകള്‍ ഇവര്‍ക്കൊപ്പം ഗ്രൂപ്പ് ടിക്കറ്റായിരുന്നു. അതുകൊണ്ട് ഈ നാലുപേരുടെയും ലഗേജുകള്‍ വിമാനത്തില്‍ നിന്നും തിരിച്ചിറക്കി വിശദമായ പരിശോധനയ്ക്ക് വിധേയമാക്കി. പ്രശ്‌നങ്ങള്‍ ഇല്ലെന്ന് ഉറപ്പുവരുത്തിയ ശേഷം ഇവരെ യാത്ര ചെയ്യാന്‍ അനുവദിച്ചു. ഇതുമൂലം ഇന്നലെ പുലര്‍ച്ചെ 2.10ന് തായ്‌ലന്റിലേക്ക് പുറപ്പെടേണ്ട വിമാനം 4.30നാണ് പുറപ്പെട്ടത്.