ചെറുപുഴ: മകളെ പ്രണയിച്ച് വിവാഹം ചെയ്തതിന്റെ വൈരാഗ്യം തീര്‍ക്കാന്‍ യുവാവിന്റെ വാഹനത്തില്‍ കഞ്ചാവ് വച്ച സംഭവത്തില്‍ ഒരാളെ കൂടി ക്രൈംബ്രാഞ്ച് അറസ്റ്റു ചെയ്തു. കോട്ടയം മുണ്ടക്കയം കരിനിലം സ്വദേശിയും അഞ്ചാം പ്രതിയുമായ ജൂബി.കെ ജോസഫ് (34) ആണ് അറസ്റ്റിലായത്. 2014 നവംബര്‍ 14നാണ് കേസിനാസ്പദമായ സംഭവം. കമ്പല്ലൂര്‍ സ്വദേശിനിയായ പെണ്‍കുട്ടിയെ പ്രാപ്പോയില്‍ കക്കോട് സ്വദേശിയായ ബിനീഷ് പ്രണയിച്ച് വിവാഹം കഴിച്ചിരുന്നു. ഒരു മാസത്തിനു ശേഷം പയ്യന്നൂരില്‍ വച്ച് ബിനീഷിന്റെ ബൈക്കില്‍ നിന്നു എക്‌സൈസ് സംഘമാണ് കഞ്ചാവ് കണ്ടെടുക്കുകയും അറസ്റ്റു ചെയ്യുകയും ചെയ്തത്. തുടര്‍ന്ന് യുവാവ് നല്‍കിയ പരാതി ക്രൈംബ്രാഞ്ച് അന്വേഷിക്കുകയായിരുന്നു.   പെണ്‍കുട്ടിയുടെ പിതാവ് ശ്രീനിവാസന്‍ ഒളിവിലാണ്.