പാലക്കാട്: ‘വെർച്ച്വൽ അറസ്റ്റ്’ എന്ന ഒരു നിയമനടപടി ഒരു അന്വേഷണസംഘവും നടപ്പാക്കുന്നില്ലെന്ന് പൊലിസ് പറയുമ്പോഴും കെണിയിൽപ്പെടുന്നവരുടെ എണ്ണത്തിൽ കുറവില്ല.സമീപകാലത്തായി സൈബർ തട്ടിപ്പിൻ്റെ മേഖലയിൽ വ്യാപകമാകുന്ന വെർച്ച്വൽ അറസ്റ്റിൻ്റെ പേരിൽ ഭീഷണിപ്പെടുത്തി പണംതട്ടുന്ന സംഘങ്ങൾ ലക്ഷ്യമിടുന്നത് ഐ.ടി മേഖലയിലുള്ളവരെയും അതുമായി ബന്ധപ്പെട്ടവരെയുമാണ്. പൊലിസിൻ്റെയും സൈബർ സെല്ലിൻ്റെയുമെല്ലാം മുന്നറിയിപ്പുകളുണ്ടായിട്ടും വലയിൽ കുരുങ്ങുന്ന വിദ്യാസമ്പന്നരുടെ നിര ദിനംപ്രതി നീളുകയാണ്.

തട്ടിപ്പു തിരിച്ചറിഞ്ഞ് പൊലിസ് സ്റ്റേഷനിലെത്തിയതിന്റെ പേരിൽ നാലു പേർ പണം നഷ്ടമാകാതെ രക്ഷപ്പെടുകയും ചെയ്തിട്ടുണ്ട്. ഒറ്റപ്പാലത്തെ ഒരു ക്ഷേത്രം പൂജാരി, പ്രവാസിയായ വനിത, വിരമിച്ച ഉദ്യോഗസ്ഥർ എന്നിവർക്കാണ് വീഡിയോകോൾ വന്നത്. ഇവരെല്ലാവരും ഐ.ടി മേഖലയിലുണ്ടായിരുന്നവരാണ്. സംശയം തോന്നി ഇവർ കൃത്യസമയത്ത് പൊലിസിനെ സമീപിച്ചതുകൊണ്ടുമാത്രമാണ് ഭീഷണിയിൽ കുരുങ്ങി പണം നഷ്ടമാകാതെ രക്ഷപ്പെട്ടത്.

വെർച്ച്വൽ അറസ്റ്റ് തുടങ്ങുന്നത് ഇങ്ങനെ

യൂനിഫോം ധരിച്ച് ഉദ്യോഗസ്ഥൻ ചമഞ്ഞെത്തുന്നയാൾ വെർച്ച്വൽ അറസ്റ്റിലാണെന്ന നിലയിൽ ഇരയെ തെറ്റിധരിപ്പിച്ച് സ്വകാര്യ വിവരങ്ങൾ വാങ്ങി ബാങ്കിൽനിന്ന് പണം പിൻവലിക്കും. ചിലരോട് ബാങ്ക് വിശദാംശങ്ങളെല്ലാം ചോദിച്ച് ഒ.ടി.പി വാങ്ങിയുമാണ് പണം തട്ടുന്നത്. ഒപ്പം, നിയമനടപടി ഒഴിവാക്കാൻ പണം ട്രാൻസ്‌ഫർ ചെയ്യിക്കുന്ന രീതിയുമുണ്ട്. ഫോണിൽ ആപ്പ് ഇൻസ്റ്റാൾ ചെയ്പ്പിച്ച് ഫോൺ പൂർണമായും തട്ടിപ്പുകാരുടെ നിയന്ത്രണത്തിലാക്കി ബാങ്ക് ആപ്പുകളും മറ്റും ഉപയോഗിച്ച് ഒ.ടി.പിയെടുത്തും വേഗത്തിൽ പണം കൈക്കലാക്കുന്നതും ഇവരുടെ രീതിയാണെന്ന് പൊലിസ് പറയുന്നു. ഒറ്റപ്പാലത്തുള്ളവർക്ക് ഇതേ രീതിയിലാണ് പണം നഷ്ടമായിട്ടുള്ളത്.

Despite police warnings, 'virtual arrest' scams continue to trap victims, especially IT professionals. Scammers posing as officials extort money through fake legal threats in Palakkad, with losses totaling over ₹40 lakhs