ന്യൂഡല്‍ഹി: മതാചാരത്തിന്റെ ഭാഗമായി താടിവയ്ക്കാന്‍ മുസ്‌ലിം പൊലിസുകാര്‍ക്ക് അവകാശമുണ്ടോയെന്ന വിഷയം സുപ്രിംകോടതി പരിശോധിക്കുന്നു. ഇത് ഭരണഘടനയുടെ 25ാം വകുപ്പ് നല്‍കുന്ന അവകാശത്തിന്റെ പരിധിയില്‍ വരുമോയെന്നാണ് സുപ്രിംകോടതി പരിശോധിക്കുന്നത്. മഹാരാഷ്ട്രയില്‍ നിന്നുള്ള എസ്.ആര്‍.പി.എഫില്‍ സേവനം ചെയ്യുന്ന കോണ്‍സ്റ്റബിള്‍ നല്‍കിയ ഹരജിയിലാണ് ചീഫ് ജസ്റ്റിസ് ഡി.വൈ ചന്ദ്രചൂഡ്, ജസ്റ്റിസുമാരായ ജെ.ബി പാര്‍ഡിവാല, മനോജ് മിശ്ര എന്നിവരടങ്ങിയ ബെഞ്ച് വിഷയം പരിശോധിക്കുന്നത്.

താടിവച്ചതിന് 1951ലെ ബോംബെ പൊലിസ് മാന്വലിന്റെ അടിസ്ഥാനത്തില്‍ ഹരജിക്കാരനെ സര്‍വിസില്‍ നിന്ന് സസ്‌പെന്‍ഡ് ചെയ്തിരുന്നു. ഇത് ഭരണഘടനയുമായി ബന്ധപ്പെട്ട സുപ്രധാന വിഷയമാണെന്നും ഒന്നിടവിട്ട ദിവസങ്ങളില്‍ വാദം കേള്‍ക്കുമെന്നും ചീഫ് ജസ്റ്റിസ് പറഞ്ഞു. സസ്‌പെന്‍ഡ് ചെയ്ത സര്‍ക്കാര്‍ നടപടി ബോംബെ ഹൈക്കോടതി ശരിവച്ചിരുന്നു. ഇതിനെതിരേ 2017ല്‍ ഹരജിക്കാരന്‍ സുപ്രിംകോടതിയെ സമീപിച്ചെങ്കിലും ഫലമുണ്ടായില്ല.

താടി വടിക്കാന്‍ സമ്മതിച്ചാല്‍ സസ്‌പെന്‍ഷന്‍ റദ്ദാക്കാമെന്നായിരുന്നു ചീഫ് ജസ്റ്റിസ് ജെ.എസ് ഖഹാര്‍, ജസ്റ്റിസുമാരായ ഡി.വൈ ചന്ദ്രചൂഡ്, എസ്.കെ കൗള്‍ എന്നിവരടങ്ങിയ ബെഞ്ചിന്റെ നിലപാട്. എന്നാല്‍ ഈ വ്യവസ്ഥ അംഗീകരിക്കാന്‍ ഹരജിക്കാരന്‍ തയാറായില്ല.