305 മിനി ബസുകള്‍ക്ക് ഓര്‍ഡര്‍ നല്‍കി കെ.എസ്.ആര്‍.ടി.സി. ഗ്രാമീണ റൂട്ടുകളില്‍ കൂടുതല്‍ സര്‍വീസ് ഉറപ്പാക്കാനായാണ് കെ.എസ്.ആര്‍.ടി.സി പുതിയ ബസുകള്‍ നിരത്തിലിറക്കുന്നത്. യാത്രാ ബുദ്ധിമുട്ട് നേരിടുന്ന ഗ്രാമീണ പ്രദേശങ്ങളിലായിരിക്കും പുതിയ ബസുകള്‍ സര്‍വീസ് നടത്തുക.

ടാറ്റ, അശോക് ലൈലാന്‍ഡ്, ഐഷര്‍ എന്നീ കമ്പനികളുടെ മിനി ബസുകളാണ് വാങ്ങാന്‍ തീരുമാനിച്ചിരിക്കുന്നത്. അശോക് ലൈലാന്‍ഡില്‍ നിന്ന് 36 സീറ്റുകളുള്ള ബസുകള്‍ക്കും, ടാറ്റയില്‍ നിന്ന് 33 സീറ്റുകളുള്ള ബസുകള്‍ക്കും,  ഐഷറില്‍നിന്ന് 28 സീറ്റുകളുള്ള ബസുകള്‍ക്കുമാണ് ഓര്‍ഡര്‍ നല്‍കിയിരിക്കുന്നത്. വലിയ ബസുകള്‍ക്ക് സര്‍വിസ് നടത്താന്‍ കഴിയാത്ത ഗ്രാമ പ്രദേശങ്ങളിലായിരിക്കും ഇവ സര്‍വീസ് നടത്തുക. നിലവില്‍ ഓര്‍ഡിനറി ബസുകളായി സര്‍വീസ് നടത്തുന്നത് ഉയര്‍ന്ന ക്ലാസില്‍ സര്‍വീസ് നടത്തിയ ശേഷം തരം മാറ്റിയ ബസുകളാണ്. പക്ഷെ ഇവയ്ക്ക് ഡീസല്‍ ചെലവ് ഉയര്‍ന്നതാണെന്ന പരിമിതിയുണ്ട്.

ഗ്രാമപ്രദേശങ്ങളിലെ സര്‍വീസുകള്‍ ഇല്ലാത്തതും കുറവുള്ളതുമായ റൂട്ടുകള്‍ കണ്ടെത്താനുള്ള ശ്രമങ്ങള്‍ ഡിപ്പോകള്‍ ആരംഭിച്ചിട്ടുണ്ട്. നിലവിലുള്ള റൂട്ടുകളിലും പുതിയ റൂട്ടുകളിലും മിനി ബസുകള്‍ സര്‍വീസ് നടത്തും. രണ്ട് വാതിലുകള്‍ ഉളള മിനി ബസുകള്‍ ആയിരിക്കും എത്തുന്നത്. കൂടുതല്‍ മൈലേജ് കിട്ടുമെന്നതും ഡീസല്‍ ചെലവ് കുറവാണെന്നതുമാണ് മിനി ബസുകളുടെ ഗുണമായി കോര്‍പ്പറേഷന്‍ അധികൃതര്‍ കാണുന്നത്.

 In a move to improve rural connectivity, KSRTC is set to launch mini buses in rural areas, while also allocating more routes to private buses, enhancing travel options for passengers and boosting business for private operators.