അങ്കോല: കര്‍ണാടക ഷിരൂരിലെ മണ്ണിടിച്ചില്‍ കാണാതായ മലയാളി ലോറി ഡ്രൈവര്‍ അര്‍ജുനായുള്ള തെരച്ചിലിനായി ഈശ്വര്‍ മാല്‍പെ പുഴയിലിറങ്ങി.പുഴയില്‍ നേവിയുടേയും എന്‍ഡിആര്‍എഫിന്റേയും സംഘങ്ങള്‍ സംയുക്തമായാണ് പരിശോധന നടത്തുന്നത്. അര്‍ജുനെ കാണാതായിട്ട് ഒരു മാസമാകുകയാണ്. 

അര്‍ജുന്റെ ലോറിയിലുണ്ടായിരുന്ന കയര്‍ കണ്ടെത്തിയ സ്‌പോട്ട് കേന്ദ്രീകരിച്ചാണ് ഇന്നും തിരച്ചില്‍ നടക്കുന്നത്. മാര്‍ക്ക് ചെയ്ത പോയിന്റ്1, 2 എന്നിവിടങ്ങളില്‍ നേവി സംഘം നിലയുറപ്പിച്ചിരിക്കുകയാണ്. പുഴയുടെ അട്ടിത്തട്ടില്‍ കണ്ടെത്തിയ മരം നീക്കം ചെയ്യാനുള്ള പ്രവര്‍ത്തനങ്ങളിലേക്ക് സംഘം കടന്നേക്കും. ഗംഗാവലിപ്പുഴയിലും പരിസരത്തും നിലവില്‍ അനുകൂല കാലാവസ്ഥയാണെന്നും ഒഴുക്ക് 2 നോട്‌സിലും താഴെയാണെന്നുമാണ് വിവരം. മാല്‍പെയും സംഘവും നദിയിലിറങ്ങി പരിശോധനകള്‍ നടത്തി.