ഇസ്‌റാഈലിന്റെ ഗാസയിലെ സൈനിക ഓപ്പറേഷനുകള്‍ക്ക് ഫലസ്തീനികളെ മനുഷ്യകവചമായി ഉപയോഗിക്കുന്നുവെന്ന് റിപ്പോര്‍ട്ടുകള്‍. നിരപാധികളായ മനുഷ്യരെ മുന്നില്‍നിര്‍ത്തിയാണ് ഇസ്രയേല്‍ സൈന്യം ഗാസയിലെ കെട്ടിടങ്ങളിലും തുരങ്കങ്ങളിലും  കടന്നുകയറുന്നത്. അന്താരാഷ്ട്ര മാനുഷിക ചട്ടങ്ങളുടെയെല്ലാം നഗ്‌നമായ ലംഘനമാണ് നടക്കുന്നതെന്ന് ഇസ്‌റാഈല്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു. 

ഗാസയിലെ ഇസ്‌റാഈല്‍ സൈനികര്‍ക്കിടയില്‍ ഫലസ്തീനികളെ മനുഷ്യകവചമായി ഉപയോഗിക്കുക എന്നത് പതിവാണെന്നും 'പ്രോട്ടോകോള്‍' പോലെയാണെന്നും റിപ്പോര്‍ട്ടില്‍ വ്യക്തമാക്കുന്നു. സൈനിക ദുരുപയോഗം പുറത്തുകൊണ്ടുവരുന്നതിനായി മുന്‍ ഇസ്‌റാഈല്‍ സൈനികര്‍ സ്ഥാപിച്ച 'ബ്രേക്കിങ് ദ സൈലന്‍സ്'എന്ന സംഘടനയും റിപ്പോര്‍ട്ടിനെ ശരിവയ്ക്കുന്നു. ഗാസയില്‍ ഇസ്‌റാഈല്‍ സ്വീകരിക്കുന്ന മനുഷ്യത്വവിരുദ്ധ സമീപനത്തെ സ്ഥിരീകരിക്കുന്ന നിരവധി മൊഴികള്‍ ശേഖരിച്ചിട്ടുണ്ടെന്നും സംഘടന വ്യക്തമാക്കുന്നു. ചീഫ് ഓഫ് സ്റ്റാഫ് ഓഫീസര്‍ക്കുള്‍പ്പെടെ ഈ രീതിയെക്കുറിച്ച് അറിവുണ്ടെന്നാണ് റിപ്പോര്‍ട്ടുകള്‍ പറയുന്നത്. 

ഫലസ്തീന്‍ യുവാക്കളെയാണ് കൂടുതലും മനുഷ്യകവചമായി ഇസ്‌റാഈല്‍ സൈന്യം ഉപയോഗിക്കുന്നത്. അവരെ സൈന്യത്തിന്റെ യൂണിഫോം ധരിപ്പിച്ച്, കൈകള്‍ പിന്നില്‍കെട്ടി, ശരീരത്തില്‍ ക്യാമറയും ധരിപ്പിച്ച് കെട്ടിടങ്ങളിലേക്കും തുരങ്കങ്ങളിലേക്കും കയറ്റിവിടുന്നതാണ് സൈന്യത്തിന്റെ രീതി. സൈനിക ഓപ്പറേഷനുകളില്‍ ഉപയോഗിക്കാനായി മാത്രം കുറ്റങ്ങളൊന്നും ചെയ്തിട്ടില്ലാത്ത ഫലസ്തീനികളെ പിടിച്ചുകൊണ്ടുപോകുന്ന പ്രവണതയും നിലനില്‍ക്കുന്നു.

ഇസ്‌റാഈല്‍ ഡിഫെന്‍സ് ഫോഴ്‌സിന്റെ യൂണിഫോമില്‍ ഫലസ്തീന്‍ സിവിലിയന്‍മാരെ തകര്‍ന്ന കെട്ടിടങ്ങളിലേക്ക് അയക്കുന്നതിന്റെ ദൃശ്യങ്ങള്‍ ജൂലൈയില്‍ പുറത്തുവന്നിരുന്നു. 'ബ്രേക്കിങ് ദ സൈലെന്‍സ്' ആരോപിക്കുന്നത് പ്രകാരം ഗാസയില്‍ ആക്രമണമാരംഭിച്ച ഘട്ടത്തില്‍ തന്നെ മനുഷ്യകവചങ്ങളെ ഉപയോഗിക്കുന്ന രീതി ഇസ്‌റാഈല്‍ സൈന്യത്തിനുണ്ടായിരുന്നു എന്നാണ്. ഫലസ്തീന്‍ പൗരന്മാരെ സ്‌ഫോടകവസ്തുക്കള്‍ക്കായുള്ള തിരച്ചിലിന് പോലും ഉപയോഗിക്കുന്നുവെന്ന് ഒരു സൈനികന്‍ മൊഴി നല്‍കിയതായി സംഘടന വ്യക്തമാക്കി.

Reports emerge of Israeli forces using Palestinian youths as human shields, sparking outrage and accusations of war crimes and human rights violations. This disturbing trend highlights the dire situation in the region and the need for international attention and action.