ന്യൂഡല്‍ഹി: ഹരിയാന നിയമസഭാ തെരഞ്ഞെടുപ്പില്‍ കോണ്‍ഗ്രസുമായി സഖ്യമില്ലെന്ന് വ്യക്തമാക്കി ആംആദ്മിയുടെ ആദ്യഘട്ട സ്ഥാനാര്‍ഥിപട്ടിക പുറത്തുവിട്ടു. 20 പേരുടെ പട്ടികയാണ് എ.എ.പി. പുറത്തുവിട്ടത്. കോണ്‍ഗ്രസിന്റെ മുഖ്യമന്ത്രി സ്ഥാനാര്‍ഥിയെന്ന് കരുതപ്പെടുന്ന ഭൂപീന്ദര്‍ സിങ് ഹൂഡ മത്സരിക്കുന്ന ഗഗഢി- കിലോയിലും ഗുസ്തി താരം വിനേഷ് ഫോഗട്ട് മത്സരിക്കുന്ന ജുലാനയിലും സ്ഥാനാര്‍ഥികളെ പ്രഖ്യാപിച്ചിട്ടില്ല.  

മണ്ഡലങ്ങളുടെ കാര്യത്തിലും സീറ്റുകളുടെ എണ്ണത്തിലും വിട്ടുവീഴ്ചയ്ക്ക് ഇരുവിഭാഗവും തയാറാവാതെ വന്നതോടെയാണ് ഹരിയാനയില്‍ കോണ്‍ഗ്രസ് എ.എ.പി. സഖ്യചര്‍ച്ചകള്‍ പരാജയപ്പെട്ടത്. വിജയസാധ്യതയുള്ള 10 സീറ്റുകള്‍ വേണമെന്നാണ് എ.എ.പി. നിലപാട്. 

അഞ്ചുമുതല്‍ എഴുവരെ സീറ്റുകളെ നല്‍കാനാവുവെന്ന് കോണ്‍ഗ്രസും വ്യക്തമാക്കി. കോണ്‍ഗ്രസ് സംഘടന ജനറല്‍ സെക്രട്ടറി കെ.സി.വേണുഗോപാലും എ.എ.പി. എം.പി. രാഘവ് ഛദ്ദയും മൂന്നുതവണ ചര്‍ച്ച നടത്തിയിട്ടും ഫലമുണ്ടായില്ല. ഇതോടെയാണ് മുഴുവന്‍ സീറ്റുകളിലും മല്‍സരിക്കുമെന്ന് എ.എ.പി. സംസ്ഥാന അധ്യക്ഷന്‍ അറിയിച്ചത്.