തേഞ്ഞിപ്പലം: കാലിക്കറ്റ് സര്‍വകലാശാലയില്‍ വിദൂര വിദ്യാഭ്യാസം മൂന്നാം സെമസ്റ്റര്‍ എം.എ ഹിസ്റ്ററി പരീക്ഷയുടെ ഏഴ് വിദ്യാര്‍ഥികളുടെ ഉത്തരക്കടലാസുകള്‍ നഷ്ടമായി. സെന്റര്‍ ഫോര്‍ എക്‌സാമിനേഷന്‍ ഓട്ടോമേഷന്‍ ആന്‍ഡ് മാനേജ്‌മെന്റ് സ്രീം) കെട്ടിടത്തില്‍ നിന്നാണ് കാണാതായത്.

പുനര്‍മൂല്യനിര്‍ണയത്തിനും പകര്‍പ്പിനും സൂക്ഷ്മപരിശോധനക്കും വിദ്യാര്‍ഥികള്‍ അപേക്ഷിച്ചിരുന്നു. നിരവധി തവണ പരീക്ഷാഭവനിലേക്ക് വിളിച്ചന്വേഷിച്ചിട്ടും റീവാല്യുവേഷന്‍ ഫലമോ ഉത്തരക്കടലാസുകളുടെ കോപ്പിയോ ലഭിച്ചില്ല. തുടര്‍ന്ന് മുഖ്യമന്ത്രിക്ക് പരാതി നല്‍കിയിട്ടും ഫലമുണ്ടായിരുന്നില്ല.

2024 ജൂലൈ 25 ന് നടന്ന പരീക്ഷാ സ്റ്റാന്റിങ് കമ്മിറ്റി യോഗത്തില്‍ ഈ കാര്യം ചര്‍ച്ച ചെയ്തിരുന്നു. തുടര്‍ന്ന് ഏഴു വിദ്യാര്‍ഥികളില്‍ നിന്ന് ഫീസൊന്നുമീടാക്കാതെ സ്‌പെഷല്‍ പരീക്ഷ നടത്താന്‍ തീരുമാനിക്കുകയായിരുന്നു. പരീക്ഷാ സ്റ്റാന്റിങ് കമ്മിറ്റി തീരുമാനത്തിന് ഈ മാസം 12 ന് വൈസ് ചാന്‍സലര്‍ അംഗീകാരവും നല്‍കി.

സാങ്കേതിക തകരാറാണ് ഉത്തരക്കടലാസുകള്‍ കാണാതായതിന് പരീക്ഷാഭവന്‍ കണ്ടെത്തിയ മുടന്തന്‍ ന്യായീകരണം. ഇവിഇെവിടുത്തെ ടയുള്ള ജീവനക്കാരെ താക്കീത് നല്‍കി മേലാല്‍ ഇത്തരം സംഭവങ്ങള്‍ ആവര്‍ത്തിക്കരുതെന്ന് മുന്നറിയിപ്പ് നല്‍കുകയും ചെയ്തിട്ടുണ്ടത്രെ. 

എന്നാല്‍ വില്‍പ്പന നടത്തിയ പാഴ് കടലാസുകള്‍ക്കൊപ്പം റീവാല്യുവേഷന്‍ നടത്താനുള്ള ആയിരക്കണക്കിന് ഉത്തരക്കടലാസുകള്‍ ലോറിയില്‍ കയറ്റിക്കൊണ്ടുപോയതില്‍ ഇപ്പോള്‍ കാണാതായതുള്‍പ്പെടെ നിരവധി വിദ്യാര്‍ഥികളുടെ ആദ്യ മൂല്യനിര്‍ണയം കഴിഞ്ഞ ഉത്തരക്കടലാസുകള്‍ ഉണ്ടെന്നാണ് പറയുന്നത്.

പരീക്ഷാഭവനില്‍ നിന്ന് ഉത്തരക്കടലാസുകള്‍ കാണാതായതിന്റെ കുറ്റം വിദ്യാര്‍ഥികളുടെ തലയില്‍ കെട്ടിവെച്ച് വീണ്ടും പരീക്ഷ എഴുതിക്കുന്ന സര്‍വകലാശാല നടപടിക്കെതിരെ പ്രതിഷേധമുയര്‍ന്നിട്ടുണ്ട്.

Calicut University faces backlash as answer sheets of seven MA History students go missing. A special exam has been announced, but students protest against the university's negligence. Read more for details.