പാലക്കാട്: പാലക്കാട്ടെ  യു.ഡി.എഫ്, എൽ.ഡി.എഫ് സ്ഥാനാർഥികൾ പത്രിക സമര്‍പ്പിച്ചു.  പാലക്കാട് ആര്‍.ഡി.ഒ എസ്. ശ്രീജിത്ത് മുമ്പാകെയാണ് യു.ഡി.എഫ് സ്ഥാനാർഥി രാഹുൽ മാങ്കൂട്ടത്തിലും എൽ.ഡി.എഫ് സ്ഥാനാർഥി ഡോ. പി. സരിനും പത്രിക സമർപ്പിച്ചത്. ഇതോടെ പാലക്കാട് നിയമസഭാ മണ്ഡലത്തില്‍ പത്രിക സമര്‍പ്പിച്ചവരുടെ എണ്ണം ഏഴായി. മൂന്ന് സെറ്റ് പത്രിക സമർപ്പിച്ച സരിൻ സ്റ്റെതസ്കോപ്പ്, ഓട്ടോ, ടോർച്ച് എന്നിവയിൽ ഒന്നാണ് ചിഹ്നമായി ആവശ്യപ്പെട്ടിരിക്കുന്നത്.

എൻ.ഡി.എ സ്ഥാനാർഥി സി. കൃഷ്ണകുമാർ ബുധനാഴ്ച പത്രിക സമർപ്പിച്ചിരുന്നു.  രാഹുൽ മാങ്കൂട്ടത്തിലിൻ്റെ കൈവശം പണമായി 25,000 രൂപയും മാതാവ് എം.ബി ബീനയുടെ കൈവശം 10,000 രൂപയുമുള്ളതായാണ് പത്രികയിൽ കാണിച്ചിരിക്കുന്നത്. 39,36,454 രൂപയുടെ ആസ്തിയാണ് രാഹുലിനുള്ളത്. മാതാവിന് 43,98,736 രൂപയുടെ ആസ്തിയുമുണ്ട്. രണ്ടുപേർക്കുമായി 49,87,598 രൂപയുടെ കടബാധ്യതയുണ്ട്. രാഹുലിൻ്റെ പേരിൽ 29 കേസുകളാണുള്ളത്. ഇതിൽ 19 എണ്ണം തീർപ്പാക്കി.

എൽ.ഡി.എഫ് സ്ഥാനാർഥി സരിൻ്റെ പക്കൽ പണമായുള്ളത് 5000 രൂപയും ഭാര്യ എസ്. സൗമ്യയുടെ കൈയിൽ 10,000 രൂപയുമാണുള്ളത്. 20,22,124. 77 രൂപയുടെ ആസ്തിയാണ് സരിനുള്ളത്. ഭാര്യക്ക് 42,19,125. 57 രൂപയുടെ ആസ്തിയുമുണ്ട്. രണ്ടുപർക്കും കടബാധ്യതകളില്ല. സരിനെതിരേ ആറ് ക്രിമിനൽ കേസുകളാണുള്ളത്. ഇതിൽ ഒരെണ്ണത്തിൽ ശിക്ഷിക്കപ്പെട്ടു.

എൻ.ഡി.എ സ്ഥാനാർഥി സി. കൃഷ്ണകുമാറിൻ്റെയും ഭാര്യ മിനിമോളുടെയും കൈവശം പണമായുള്ളത് 10,000 രൂപ വീതമാണ്.  40 ലക്ഷത്തിൻ്റെ സ്വത്ത് കൃഷ്ണകുമാറിനും 39 ലക്ഷം രൂപയുടെ സ്വത്ത് ഭാര്യക്കുമുണ്ട്. രണ്ടുപേർക്കുമായി 6,84,733 രൂപയുടെ കടബാധ്യതയുണ്ട്. 21 കേസുകളാണ് കൃഷ്ണകുമാറിനെതിരേയുള്ളത്. പത്തെണ്ണത്തിൽ വിചാരണ നടന്നുകൊണ്ടിരിക്കുന്നു.