ആലപ്പുഴ: കയർമേഖല കരകയറാനാവാത്തവിധം   പ്രതിസന്ധിയിലായിട്ടും തിരിഞ്ഞുനോക്കാതെ സർക്കാര്‍. കയര്‍ കോര്‍പറേഷനിലും കയര്‍ഫെഡിലും കെട്ടിക്കിടക്കുന്ന കയര്‍ ഉല്‍പന്നങ്ങള്‍ വിറ്റഴിക്കാന്‍ ആവശ്യമായ നടപടികളില്ല. കയർമേഖലയിലെ പ്രതിസന്ധി പരിഹരിക്കാന്‍ വിദഗ്ധ സമിതി ഇടക്കാല റിപ്പോർട്ട് സമർപ്പിച്ചിട്ടും പ്രശ്നപരിഹാരമില്ലെന്നാണ് പരാതി.

തേങ്ങയുടെ തൊണ്ട് സംഭരണം, നാളികേര ഉൽപാദനം, കയർ നൂൽക്കുന്ന മേഖല, കയർ ഉൽപന്ന നിർമാണ മേഖല, കയറ്റുമതി, ചെറുകിടമേഖല, പൊതുമേഖലാ സ്ഥാപനങ്ങൾ, സൊസൈറ്റികൾ, കയർ ഭൂവസ്ത്രത്തിൻ്റെ സാധ്യതകൾ, കയർ ബോർഡ്, യന്ത്രവൽക്കരണം തുടങ്ങിയ വിഷയങ്ങളില്‍ പ്രശ്നപരിഹാര ശുപാർശകൾ റിപ്പോർട്ടിലുണ്ട്. എന്നാല്‍, സര്‍ക്കാര്‍തലത്തില്‍ ഇതു നടപ്പാക്കാന്‍ യാതൊരു നടപടിയുമില്ല.

സംസ്ഥാനത്തെ  തീരദേശ  ജില്ലകളുടെ പ്രതാപത്തിന്റെ പ്രതീകമായിരുന്നു  കയര്‍മേഖലയും ചെറുതും വലുതുമായ കയര്‍ഫാക്ടറികളും. നിലവില്‍ മുന്നൂറോളം ചെറുകിട കയർ സംരംഭങ്ങൾ പൂട്ടിപ്പോയെന്നാണ് അനൗദ്യോഗിക കണക്ക്. ലാഭത്തിൽ പ്രവർത്തിച്ചിരുന്ന കയർ യൂനിറ്റുകൾ അടക്കം നഷ്ടത്തിലേക്ക് കൂപ്പുകുത്തി.

എന്നാല്‍, എത്ര ചെറുകിട കയർ സംരംഭങ്ങൾ  അടച്ചുപൂട്ടിയെന്നത് സംബന്ധിച്ച് സർക്കാരിന്  കൃത്യമായ കണക്കുകളില്ല.
സംസ്ഥാനത്ത് വിവിധ  കയർ സൊസൈറ്റികള്‍ക്ക്  കീഴിൽ  ഏഴായിരത്തോളം ചെറുകിട  ഉൽപാദകരുണ്ട്. പ്രതിസന്ധി പരിഹരിക്കാന്‍ ഇന്ത്യൻ മാർക്കറ്റിലും വിദേശ മാർക്കറ്റിലും കൂടുതൽ വിപണി കണ്ടെത്തണമെന്നാണ് കയർ സൊസൈറ്റികൾ ആവശ്യപ്പെടുന്നത്. 

കയർ മേഖലയിലെ പ്രശ്നങ്ങള്‍ പരിഹരിക്കണമെന്നാവശ്യപ്പെട്ട് കേരള കയർ വർക്കേഴ്സ് സെന്റർ (സി.ഐ.ടി.യു) പ്രക്ഷോഭം സംഘടിപ്പിച്ചിരുന്നു. കയർ മേഖലയെ നിലനിർത്താൻ വേണ്ട സഹായങ്ങൾ വ്യവസായ വകുപ്പിൽ  നിന്നുണ്ടാകുന്നില്ലെന്ന വിമർശനമാണ് ഉയരുന്നത്.