കൊച്ചി: സ്‌കൂള്‍ കായികമേളക്കെത്തുന്ന വിദ്യാര്‍ഥികള്‍ക്ക് സൗജന്യയാത്രയൊരുക്കി കൊച്ചി മെട്രോ. കായികമേള നടക്കുന്ന അഞ്ചാം തീയതി മുതല്‍ 11ാം തീയതി വരെയാണ് ആനുകൂല്യം ലഭിക്കുക. ദിവസം ആയിരം കുട്ടികള്‍ക്കാണ് സൗജന്യ യാത്രയൊരുക്കുകയെന്ന് പദ്ധതി പ്രഖ്യാപന വേളയില്‍ എറണാകുളം ജില്ല കലക്ടര്‍ എന്‍.എസ്.കെ ഉമേഷ് പറഞ്ഞു. 

39 ഇനങ്ങളിലായി 2400ഓളം കുട്ടികളാണ് മത്സരത്തില്‍ പങ്കെടുക്കാനായി എറണാകുളത്തെത്തുക. കലൂര്‍ സ്റ്റേഡിയത്തില്‍വെച്ചാണ് മേളയുടെ ഉല്‍ഘാടനം നടക്കുന്നത്. നടന്‍ മമ്മൂട്ടി ചടങ്ങില്‍ മുഖ്യാതിഥിയാകും. 

ഇത് ആദ്യമായാണ് എല്ലാ കായിക ഇനങ്ങളും ഒരേ ജില്ലയില്‍ നടത്തുന്നത്. മാത്രമല്ല ഗള്‍ഫ് രാജ്യങ്ങളില്‍ നിന്നുള്ള എട്ട് സ്‌കൂളുകളും മേളയില്‍ പങ്കെടുക്കുന്നുണ്ട്. ഇതും ചരിത്രമാണ്. 

സമാപന ചടങ്ങില്‍ മുഖ്യമന്ത്രി പിണറായി വിജയന്‍ പങ്കെടുക്കും. വിജയികള്‍ക്ക് മുഖ്യമന്ത്രിയുടെ പേരിലാണ് ട്രോഫി നല്‍കുകയെന്ന പ്രത്യേകതയും ഇത്തവണയുണ്ട്. കാസര്‍ഗോഡ് നിന്നും തിരുവനന്തപുരത്ത് നിന്നും ദീപശിഖ പ്രയാണം എറണാകുളം ജില്ലയിലെത്തും. 50 സ്‌കൂളുകളിലായി താമസ സൗകര്യവും ഏര്‍പ്പെടുത്തിയിട്ടുണ്ട്.

School Sports Festival Kochi Metro with free travel for students