വെള്ളറട: അടിസ്ഥാന സൗകര്യമില്ലാത്തതില്‍ പ്രതിഷേധിച്ചും പി.ടി.എ ഫണ്ട് ദുരുപയോഗം ചെയ്യുന്നുവെന്നാരോപിച്ചും വെള്ളറട യു.ഐ.ടിയിലെ വിദ്യാര്‍ഥികള്‍ റോഡില്‍ കുത്തിയിരുപ്പ് സമരം നടത്തി.
സ്ഥലസൗകര്യമില്ലാത്തതാണ് ഇവിടുത്തെ പ്രധാന പ്രശ്‌നം. ഇരുന്നൂറിലധികം കുട്ടികള്‍ പഠിക്കുന്ന ഇവിടെ രണ്ടു ടോയ്‌ലെറ്റുകള്‍ മാത്രമാണുള്ളത്. ഇടുങ്ങിയതും ഇരുട്ടു നിറഞ്ഞതുമായ കെട്ടിടത്തില്‍ ശ്വാസം മുട്ടും വിധമാണ് കുട്ടികളിരിക്കുന്നത്. കുടിവെള്ളമെടുക്കുന്ന കിണര്‍ വൃത്തിയാക്കിയിട്ട് കാലങ്ങളായി.
സമീപത്തെ കെ.എസ്.ആര്‍.ടി.സി.വര്‍ക്‌ഷോപ്പില്‍നിന്നും ഒഴുകിയെത്തുന്ന ഓയില്‍ കലര്‍ന്ന വെള്ളമാണ് കിണറില്‍ നിന്നു ലഭിക്കുന്നത്. പി.ടി.എ ഫണ്ടായി 5000 രൂപ മുതല്‍ 10000 രൂപവരെ വാങ്ങുന്നുണ്ടെങ്കിലും ഇതുവരെ പി.ടി.എ കൂടിയിട്ടില്ലെന്ന് വിദ്യാര്‍ഥികള്‍ പറയുന്നു. രസീത് നല്‍കാതെയുള്ള പണ പിരിവും നടക്കുന്നുണ്ടത്രേ. വെള്ളറട എസ്.ഐ.യുടെ സാനിധ്യത്തില്‍ തിങ്കളാഴ്ച പി.ടി.എ വിളിക്കാമെന്ന പ്രിന്‍സിപ്പാളിന്റെ ഉറപ്പിലാണ് വിദ്യാര്‍ഥികള്‍ സമരം അവസാനിപ്പിച്ചത്.