കൊച്ചി: നടനും നിര്‍മാതാവുമായ സൗബിന്‍ ഷാഹിറിന്റെ കൊച്ചിയിലെ ഓഫിസുകളില്‍ നടന്ന ആദായനികുതി വകുപ്പ് റെയ്ഡില്‍ 60 കോടിയുടെ നികുതി വെട്ടിപ്പെന്ന് പ്രാഥമിക കണ്ടെത്തല്‍.  പറവ ഫിലിംസ് കമ്പനി നടത്തിയ സാമ്പത്തിക ഇടപാടുകളുമായി ബന്ധപ്പെട്ടാണ് റെയ്ഡ് നടത്തിയത്.

മഞ്ഞുമ്മല്‍ ബോയ്‌സ് എന്ന ഹിറ്റ് സിനിമയുടെ പണമിടപാട് സംബന്ധിച്ചാണ് പരിശോധന നടന്നത്. കേരളത്തിനകത്തും പുറത്തുമുള്ള സിനിമയില്‍ നിന്നുള്ള വരുമാനം 140 കോടിയാണ്. വരവ് ചിലവ് കണക്കുകളിലും പൊരുത്തക്കേടുകള്‍ കണ്ടെത്തിയതായും ഐ.ടി വൃത്തങ്ങള്‍ വ്യക്തമാക്കുന്നു.

ക്രമക്കേട് കണ്ടെത്തിയതോടെ നടന്‍ സൗബിനെ ആദായനികുതി വകുപ്പ് ചോദ്യം ചെയ്യും. അതേസമയം, പരിശോധന അവസാനിച്ചിട്ടില്ലെന്നാണ് ആദായനികുതി വകുപ്പ് വൃത്തങ്ങള്‍ വ്യക്തമാക്കുന്നത്.  

ആദായനികുതി വകുപ്പ് കൊച്ചി യൂനിറ്റിലെ ഉദ്യോഗസ്ഥരാണ് സൗബിന്റെ വിവിധ ഓഫിസുകളില്‍ പരിശോധനയ്ക്ക് എത്തിയത്. പറവ ഫിലിം കമ്പനിയുടെ ഓഫിസ്, പുല്ലേപ്പടിയിലെ ഡ്രീം ബിഗ് ഡിസ്ട്രിബ്യൂട്ടേഴ്‌സ് ഓഫിസ് എന്നിവിടങ്ങളില്‍ നടന്ന റെയ്ഡിലാണ് ക്രമക്കേട് കണ്ടെത്തിയത്. 

സിനിമ മേഖലയില്‍ കള്ളപ്പണ ഇടപാട് നടക്കുന്നുവെന്ന് എന്‍ഫോഴ്‌സ്‌മെന്റ് ഡയരക്ടറേറ്റിന് നേരത്തെ പരാതി ലഭിച്ചിരുന്നു. സിനിമാ നിര്‍മാണ കമ്പനികളെ കേന്ദ്രീകരിച്ച് ഇ.ഡിയും പരിശോധന നടത്തി വരികയാണ്.