ന്യൂഡല്‍ഹി: കേന്ദ്രമന്ത്രി ധര്‍മേന്ദ്ര പ്രധാന്റെ രാജിയാവശ്യപ്പെട്ട് കോക്രോച്ച് ജനതാ പാര്‍ട്ടി (സി.ജെ.പി) ആഹ്വാനം ചെയ്ത രാജ്യവ്യാപക പ്രതിഷേധത്തിന്റെ ഭാഗമായി വിവിധ നഗരങ്ങളില്‍ ഇന്നലെ വന്‍റാലികള്‍ നടന്നു. കൊല്‍ക്കത്ത, ചെന്നൈ, ഹൈദരാബാദ്, ബംഗളൂരു, മുംബൈ, നാസിക്, റായ്പൂര്‍ തുടങ്ങിയ നഗരങ്ങളില്‍ നടന്ന പ്രതിഷേധ റാലികളില്‍ ആയിരക്കണക്കിന് ആളുകള്‍ പങ്കെടുത്തു. 
കൊല്‍ക്കത്തയില്‍ സി.ജെ.പിയും ഇടതു വിദ്യാര്‍ഥി സംഘടനകളും സംഘടിപ്പിച്ച പ്രതിഷേധ റാലിയില്‍ നിരവധിപേര്‍ പങ്കെടുത്തു. സെന്‍ട്രല്‍ കൊല്‍ക്കത്തയില്‍ സീല്‍ദ മുതല്‍ എസ്പ്ലനേഡ് വരെ നീണ്ട പ്രകടനത്തിന് കനത്ത പൊലിസ് സുരക്ഷ ഒരുക്കിയിരുന്നു. 
തമിഴ്‌നാട്ടില്‍ ചെന്നൈ, കള്ളകുറിച്ചി, മധുരൈ, കോയമ്പത്തൂര്‍, ശിവഗംഗ എന്നിവിടങ്ങളില്‍ വിദ്യാര്‍ഥികളുടെ പ്രതിഷേധ മാര്‍ച്ച് നടന്നു. കള്ളക്കുറിച്ചില്‍ റോഡ് ഉപരോധിച്ച 50 ഓളം വിദ്യാര്‍ഥികളെ പൊലിസ് അറസ്റ്റ് ചെയ്തു. ബംഗളൂരു ഫ്രീഡം പാര്‍ക്കില്‍ സി.ജെ.പിയുടെ ആഭിമുഖ്യത്തില്‍ പ്രതിഷേധ ധര്‍ണ നടത്തി.