കണ്ണൂര്‍: ബൈക്കിലെത്തിയ സംഘം വീട്ടമ്മയുടെ താലിമാല പൊട്ടിച്ച് രക്ഷപ്പെട്ടതായി പരാതി. കഴിഞ്ഞ ദിവസം ഉച്ചയോടെയാണ് തുളിച്ചേരി കാടന്‍പീടികയിലെ ജിഷില്‍ നിവാസില്‍ പി ശ്രീജയുടെ(46) അഞ്ചേമുക്കാല്‍ പവന്‍ താലിമാല നഷ്ടപ്പെട്ടത്. മകന് സ്‌കൂളിലേക്ക് കൊണ്ടുപോകാനാവശ്യമായ പഠന സാധനങ്ങള്‍ വാങ്ങാന്‍ കണ്ണൂരിലേക്ക് വരവെയാണ് കാടന്‍ പീടികക്കടുത്ത് ബൈക്കിലെത്തിയവര്‍ മാലപൊട്ടിച്ചത്. ബൈക്ക് വരുന്നത് കണ്ട് റോഡിന്റെ അരികിലേക്ക് മാറിനിന്നെങ്കിലും പിറകിലിരുന്നയാള്‍ പുറത്ത് ശക്തിയായി അടിച്ചപ്പോള്‍ താന്‍ വീഴാന്‍ നോക്കിയെന്നും ഈസമയം മാല പൊട്ടിച്ച് തളാപ്പ് ഭാഗത്തേക്ക് രക്ഷപ്പെട്ടുവെന്നുമാണ് പൊലിസില്‍ നല്‍കിയ പരാതി.