പാലക്കാട്: താങ്ങാവുന്നതിലപ്പുറത്തെ വേദന പകര്‍ന്ന ഒരു അപകടത്തിന്റെ ഓര്‍മകളുമായി ഇന്ന് കരിമ്പയിലെ കുട്ടികളെല്ലാം സ്‌കൂളിലെത്തും. അവര്‍ പതിവു കുശലം ചൊല്ലാറുള്ള കൂട്ടുകാരില്‍ ആ നാല്‍വര്‍ സംഘമില്ലല്ലോ എന്നൊരു തീരാനോവിലമര്‍ന്ന്. ഇന്നവിടെ മുഴങ്ങുന്ന ഓരോ മണിയടിക്കും കണ്ണീര്‍ താളമായിരിക്കും.

പരീക്ഷയുടെ വേവലാതിയില്‍ ക്ലാസുകളിലേക്ക് കയറുമ്പോള്‍ പിന്നേയും നോവായി ഹാളില്‍ നാലു സീറ്റുകള്‍ ഒഴിഞ്ഞു കിടക്കും.  

കഴിഞ്ഞ വ്യാഴാഴ്ചയാണ് പനയംപാടത്തെ അപകടപാതയില്‍ ലോറി ദേഹത്തേക്ക് മറിഞ്ഞ് എട്ടാംക്ലാസ് വിദ്യാര്‍ഥികളായ നാലുപേര്‍ മരിച്ചത്. എട്ടാം ക്ലാസ് വിദ്യാര്‍ഥിനികളായ പി.എ. ഇര്‍ഫാന ഷെറിന്‍, റിദ ഫാത്തിമ, കെ.എം. നിദ ഫാത്തിമ, എ.എസ്. ആയിഷ എന്നിവരാണ് നിയന്ത്രണം വിട്ട ലോറി പാഞ്ഞുകയറി ദാരുണമായി മരിച്ചത്. രണ്ട് ലോറികള്‍ തമ്മില്‍ കൂട്ടിയിടിച്ച് ഒരു ലോറി കുട്ടികളുടെ മുകളിലേക്ക് മറിയുകയായിരുന്നു.

സ്‌കൂളിനേയും കുട്ടികളേയും ഒരു പോലെ കണ്ണീരിലാഴ്ത്തിയ അപകടമായിരുന്നു അത്. പലരും അതിന്റെ ഞെട്ടലില്‍ നിന്ന് മോചിതരായിട്ടില്ല. ഇന്ന് സ്‌കൂളില്‍ അനുശോചന യോഗവും നടക്കുന്നുണ്ട്. ശേഷം ക്രിസ്തുമസ് പരീക്ഷകള്‍ യഥാക്രമം നടക്കും. കുട്ടികള്‍ക്ക് ആവശ്യമായ പ്രത്യേക കൗണ്‍സിലിങ് നല്‍കാനും തീരുമാനമുണ്ട്.