ചെന്നൈ: വൈദ്യുതപോസ്റ്റില്‍നിന്ന് ഷോക്കേറ്റ് വൈദ്യുതിവകുപ്പിലെ രണ്ട് ജീവനക്കാര്‍ക്ക് ദാരുണാന്ത്യം. തിരുച്ചിറപ്പള്ളി ഒലയൂരിലാണ് ഞെട്ടിക്കുന്ന സംഭവം. മണൈപ്പാറൈ സ്വദേശികളായ മാണിക്കം, കലൈമാണി എന്നിവരാണ് മരിച്ചത്.വൈദ്യുത പോസ്റ്റിലെ അറ്റകുറ്റപ്പണിക്കിടെയാണ് ഇരുവര്‍ക്കും ഷോക്കേറ്റത്.  ഇരുവരും തല്‍ക്ഷണം മരിച്ചു. കരാര്‍ ജീവനക്കാരായിരുന്നു ഇവര്‍.

ഇന്ന് രാവിലെയാണ് അറ്റകുറ്റപ്പണിക്കായി ഇരുവരും എത്തിയത്. പണി തുടരുന്നതിനിടെ ഇവര്‍ പോസ്റ്റിലുണ്ട് എന്നറിയാതെ ലൈന്‍ ഓണാക്കിയതാണ് ദുരന്തത്തിന് കാരണമെന്നാണ് പുറത്തുവരുന്ന വിവരം. 

ഷോക്കേറ്റ ഇവരുടെ ശരീരത്തില്‍ തീപിടിക്കുന്നതും ഇതില്‍ ഒരാള്‍ തഴേക്ക് വീഴുന്നതുമായ ദൃശ്യങ്ങള്‍ സോഷ്യല്‍ മീഡിയയില്‍ ഉള്‍പ്പെടെ വ്യാപകമായി പ്രചരിക്കുന്നുണ്ട്. സംഭവത്തില്‍ അന്വേഷണം നടത്തുമെന്ന് വൈദ്യുതി വകുപ്പ് അറിയിച്ചിട്ടുണ്ട്. അപകടത്തിന് പിന്നില്‍ അസ്വാഭാവികത ഉണ്ടോയെന്നും അനാസ്ഥയോ വീഴ്ചയോ സംഭവിച്ചിട്ടുണ്ടോ എന്നും അന്വേഷിക്കുമെന്ന് പൊലിസ് അറിയിച്ചു.