തിരുവനന്തപുരം: മുസ്‌ലിംവര്‍ഗീയ ചേരിയുടെ പിന്തുണയോടെയാണ് രാഹുല്‍ഗാന്ധിയും പ്രിയങ്കാ ഗാന്ധിയും ലോക്‌സഭയിലെത്തിയതെന്ന സി.പി.എം. പൊളിറ്റ് ബ്യൂറോ അംഗം എ. വിജയരാഘവന്റെ പരാമര്‍ശത്തെ ന്യായീകരിച്ച് കേന്ദ്രകമ്മറ്റി അംഗം പി.കെ ശ്രീമതി. വിജയരാഘവന്‍ അങ്ങനെ തെറ്റായി പറഞ്ഞതായി തോന്നിയില്ലെന്നും പാര്‍ട്ടി നിലപാടാണ് പറഞ്ഞതെന്നും ശ്രീമതി തിരുവനന്തപുരത്ത് മാധ്യമങ്ങളോട് പറഞ്ഞു.

കേരളത്തിലും വര്‍ഗീയവാദികളും തീവ്രവാദികളും തല ഉയര്‍ത്താന്‍ ശ്രമിക്കുന്നുണ്ട്. അത്തരം പ്രവര്‍ത്തനങ്ങള്‍ കേരളത്തില്‍ നടപ്പാക്കാന്‍ അനുവദിക്കില്ല. അത് ആരായാലും. ഹിന്ദു വര്‍ഗീയവാദികളായാലും മുസ് ലിം വര്‍ഗീയവാദികളായാലും അതിന് എതിരായ നിലപാടാണ് സി.പി.എം സ്വീകരിക്കുകയെന്നും അവര്‍ പറഞ്ഞു. 

കേരളത്തിലെ പ്രധാനപ്പെട്ട സാമുദായിക നേതാവ് വെള്ളാപ്പള്ളി നടേശന്‍ കോണ്‍ഗ്രസിനെ കുറിച്ച് പറയുന്നത് ശ്രദ്ധിക്കണം. വര്‍ഗീയവാദികളുമായി കൂട്ടുകെട്ട് ഉണ്ടാക്കിയാണ് കോണ്‍ഗ്രസ് മത്സരിക്കുന്നത്. അതാണ് ചൂണ്ടിക്കാണിച്ചതെന്നും പി.കെ ശ്രീമതി കൂട്ടിച്ചേര്‍ത്തു. 

മുസ്‌ലിംവര്‍ഗീയ ചേരിയുടെ ദൃഢമായ പിന്തുണയില്ലെങ്കില്‍ രാഹുല്‍ഗാന്ധി വയനാട്ടില്‍നിന്ന് ഡല്‍ഹിയിലെത്തുമായിരുന്നോയെന്ന വിജയരാഘവന്റെ പരാമര്‍ശമാണ് വിവാദങ്ങള്‍ക്ക് തിരികൊളുത്തിയത്. സി.പി.എമ്മിനെയും പിണറായി സര്‍ക്കാരിനേയും തകര്‍ക്കാന്‍ യു.ഡി.എഫിനൊപ്പം ജമാഅത്തെ ഇസ് ലാമിയും എസ്.ഡി.പി.ഐയും ബി.ജെ.പിയും മാധ്യമങ്ങളും ഒന്നിച്ച് അണിനിരക്കുകയാണെന്നും വിജയരാഘവന്‍ പറഞ്ഞു.