മെൽബൺ: ഓസ്‌ട്രേലിയക്കെതിരായ നാലാം ടെസ്റ്റിൽ സെഞ്ച്വറി നേടി നിതീഷ് കുമാർ റെഡ്ഢി. റെഡ് ബോൾ ക്രിക്കറ്റിലെ താരത്തിന്റെ ആദ്യ സെഞ്ച്വറി ആണിത്. നിലവിൽ മത്സരം മഴ മൂലം നിർത്തിവെച്ചിരിക്കുകയാണ്. നിലവിൽ ഇന്ത്യ 358 റൺസിന്‌ ഏഴു വിക്കറ്റുകൾ എന്ന നിലയിലാണ്. ൧൭൬ പന്തിൽ പുറത്താവാതെ 105 റൺസ് നേടിയാണ് നിതീഷ് ക്രീസിൽ തുടരുന്നത്. പത്തു ഫോറുകളും ഒരു സിക്സുമാണ് താരം ഇതുവരെ നേടിയിട്ടുള്ളത്.

ഈ സെഞ്ച്വറിയോടെ ടെസ്റ്റ് ക്രിക്കറ്റിൽ ഇന്ത്യക്കായി എട്ടാം നമ്പറിൽ ഇറങ്ങി സെഞ്ച്വറി നേടുന്ന ഏറ്റവും പ്രായം കുറഞ്ഞ താരമായി മാറാനും നിതീഷിന് സാധിച്ചു. തന്റെ 21ാം വയസിലാണ് നിതീഷ് കുമാർ റെഡ്ഢി ഈ നേട്ടം സ്വന്തമാക്കിയിരിക്കുന്നത്. ഈ നേട്ടത്തിൽ ഒന്നാം സ്ഥാനത്തുള്ളത് അജയ് രത്രയാണ്. 2002ൽ വെസ്റ്റ് ഇൻഡീസിനെതിരെ എട്ടാം നമ്പറിൽ ഇറങ്ങി സെഞ്ച്വറി നേടിയാണ് താരം ഈ നേട്ടം കൈപ്പിടിയിലാക്കിയത്. തന്റെ 20ാം വയസിലാണ് അജയ് രത്ര ഈ നേട്ടം സ്വന്തമാക്കിയത്. 

നിതീഷിനൊപ്പം വാഷിംഗ്ടൺ സുന്ദറും അർദ്ധ സെഞ്ച്വറി നേടിക്കൊണ്ട് മികച്ച പ്രകടനമാണ് നടത്തിയത്. 162 പന്തിൽ 50 റൺസാണ് താരം നേടിയത്. ഇരുവരും ചേർന്ന് 127 റൺസിന്റെ കൂട്ടുകെട്ടാണ് പടുത്തുയർത്തിയത്. യശ്വസി ജെയ്‌സ്വാളും അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. 118 പന്തിൽ 82 റൺസ് ആണ് ജെയ്‌സ്വാൾ നേടിയത്. 11 ഫോറുകളും ഒരു സിക്സുമാണ് താരം നേടിയത്. വിരാട് കോഹ്‌ലി 86 പന്തിൽ 36 റൺസും കെഎൽ രാഹുൽ 42 പന്തിൽ 24 റൺസും നേടി.