പുതുനഗരം: പുതുനഗരം റെയില്‍വേ സ്റ്റേഷനില്‍ കുടിവെള്ളം നിലച്ച് രണ്ടാഴ്ച്ച. യാത്രക്കാര്‍ ദുരിതത്തില്‍. ഗേജ്മാറ്റം ഉദ്ഘാടനം സമയത്ത് പുതുനഗരം റെയില്‍വേ സ്റ്റേഷനില്‍ സ്ഥാപിച്ച് കുഴല്‍ കിണര്‍ മോട്ടോര്‍ തകരാറിലായതാണ് ജീവനക്കാര്‍ക്കും യാത്രക്കാര്‍ക്കും കുടിവെള്ളമില്ലാത്ത അവസ്ഥയുണ്ടാക്കീട്ടുള്ളത്. ദിനംപ്രതി ആയിരത്തിലധികം യാത്രക്കാര്‍ വന്നുപോകുന്ന പുതനഗരം റെയില്‍വേ സ്റ്റേഷനില്‍ കുടിവെള്ളം ഇല്ലാതായതോടെ തിരുവനന്ദപുരം, തിരുചെന്തൂര്‍ എന്നിവിടങ്ങളിലേക്ക് ദീര്‍ഘദൂരയാത്ര ചെയ്യുന്നവര്‍ക്കാണ് ദുരിതമുണ്ടായിട്ടുള്ളത്. കുടിവെള്ളത്തിനുള്ള വാട്ടര്‍കൂളര്‍ സ്ഥാപിച്ചിട്ടുണ്ടെങ്കിലും വെള്ളമില്ലാത്തതിനാല്‍ യാത്രക്കാര്‍ സ്‌റ്റേഷന്‍ മാസ്റ്ററോട് തര്‍ക്കിക്കുന്നത് പതിവായി മാറിയിട്ടുണ്ട്.
കംഫര്‍ട്ട് സ്റ്റേഷന്‍ ഏജന്‍സിയെ ഏല്‍പ്പിച്ചിട്ടില്ലെങ്കിലും അത്യാവശ്യക്കാര്‍ക്ക് സ്‌റ്റേഷന്‍ മാസ്റ്ററോട് താക്കോല്‍ വാങ്ങി തുറന്ന് ഉപയോഗിക്കാറുണ്ടെങ്കിലും വെള്ളമില്ലാതായതോടെ അതും പ്രതിസന്ധിയിലായി. മോട്ടോര്‍ തകരാറായതിനെ സംബന്ധിച്ച് റെയില്‍വേ അധികൃതര്‍ക്ക് പരാതി അയച്ചിട്ടുണ്ടെങ്കിലും നടപടിയുണ്ടായിട്ടില്ലെന്നാണ് പുതുനഗരം സ്റ്റേഷനിലുള്ളവരുടെ മറുപടി. യാത്രക്കാരെ കുടിവെള്ളമില്ലാതെ വലക്കുന്ന നടപടിക്കെതിരേ സമരത്തിനിറങ്ങുമെന്ന് യാത്രക്കാര്‍മുന്നറിയിപ്പു നല്‍കി.