ന്യൂയോർക്ക്: 2024 വനിതാ ലോക ബ്ലിറ്റ്‌സ് ചാമ്പ്യൻഷിപ്പിന്റെ ക്വാർട്ടർ ഫൈനലിലേക്ക് യോഗ്യത നേടി ഇന്ത്യൻ താരം ആർ വൈശാലി. മത്സരത്തിൽ തോൽവിയറിയാതെ 9.5 എന്ന പോയിൻ്റുമായാണ് ആർ വൈശാലി ഫിനിഷ് ചെയ്തത്. രണ്ടാം സ്ഥാനത്തുള്ളവരേക്കാൾ ഒരു പോയിൻ്റ് മുന്നിലെത്തിക്കൊണ്ടാണ് വൈശാലി അടുത്ത റൗണ്ടിലേക്ക് മുന്നേറിയത്. മത്സരത്തിൽ എട്ട് വിജയങ്ങളാണ് വൈശാലി സ്വന്തമാക്കിയത്. മൂന്ന് മത്സരങ്ങൾ സമനിലയിൽ ആവുകയും ചെയ്തു. 8.5 പോയിൻ്റുമായി ചൈനയുടെ ലെയ് ടിംഗ്ജി ആയിരുന്നു രണ്ടാം സ്ഥാനത്തെത്തിയിരുന്നത്. 

ഇതോടെ അടുത്തിടെ ലോക വനിതാ റാപ്പിഡ് ചെസ് ചാമ്പ്യൻഷിപ്പിൽ കിരീടം നേടിയ ഇന്ത്യയുടെ കൊനേരു ഹംപിക്ക് ശേഷം രണ്ടാം ഘട്ടത്തിലേക്ക് കടക്കുന്ന രണ്ടാമത്തെ ഇന്ത്യൻ താരം ആയി മാറാനും വൈശാലിക്ക് സാധിച്ചു. ചാമ്പ്യൻഷിപ്പിന്റെ പതിനൊന്നാം റൗണ്ടിലാണ് കൊനേരു ഹംപി തന്റെ വിജയം സ്വന്തമാക്കിയത്. ഇന്തോനേഷ്യൻ താരമായ ഐറിൻ സുകന്ദറിനെ പരാജയപ്പെടുത്തിയാണ് കൊനേരു ഹംപി കിരീടം സ്വന്തമാക്കിയത്. 

തന്റെ കരിയറിലെ രണ്ടാം റാപ്പിഡ് ചെസ് ചാമ്പ്യൻഷിപ്പ് കിരീടമായിരുന്നു കൊനേരു ഹംപി നേടിയത്. ഇതിനു മുമ്പ് 2019ൽ ആയിരുന്നു കൊനേരു ഹംപി വനിതാ റാപ്പിഡ് ചെസ് ചാമ്പ്യൻഷിപ്പിൽ വിജയിച്ചത്. ഇതോടെ രണ്ട് തവണ ലോക റാപ്പിഡ് ചെസ് ചാമ്പ്യൻഷിപ്പ് വിജയിക്കുന്ന രണ്ടാമത്തെ വനിതാ താരമായി മാറാനും കൊനേരു ഹംപിക്ക് സാധിച്ചിരുന്നു. ചൈനയുടെ ജു വെൻജൂൺ ആണ് ഇതിനു മുമ്പ് ഈ നേട്ടം സ്വന്തമാക്കിയ ആദ്യ വനിതാ താരം. ബുധനാഴ്ചയാണ് ചാമ്പ്യൻഷിപ്പിലെ ക്വാർട്ടർ ഫൈനൽ നടക്കുന്നത്. ക്വാർട്ടറിൽ ഷു ജിനറെയാണ് വൈശാലി നേരിടുക.