ഖത്തര്‍: 2025 ന് രാജകീയ തുടക്കം കുറിച്ച് പാരീസ് സെന്റ് ജെര്‍മെയ്ന്‍. ഏകപക്ഷീയമായ ഒരു ഗോളിന് മൊണാക്കോയെ തറപറ്റിച്ചാണ് പിഎസ്ജി ഫ്രഞ്ച് സൂപ്പര്‍ കപ്പ് സ്വന്തമാക്കിയത്. തുടര്‍ച്ചയായ മൂന്നാം തവണയാണ് പിഎസ്ജി ഫ്രഞ്ച് സൂപ്പര്‍ കപ്പില്‍ മുത്തമിടുന്നത്. ആകെ പതിമൂന്നാം തവണയാണ് പിഎസ്ജി കിരീടം നേടുന്നത്.

കളിയുടെ ഫലം ഞങ്ങളുടെ ആധിപത്യത്തെയാണ് സൂചിപ്പിക്കുനന്ത്, പിഎസ്ജി കോച്ച് ലൂയിസ് എന്റിക് പറഞ്ഞു. ലോകകപ്പ് മത്സരങ്ങള്‍ക്ക് വേദിയായിരുന്ന 974 സ്റ്റേഡിയത്തില്‍ വെച്ചായിരുന്നു കലാശപ്പോരാട്ടം. കളിയുടെ മുഴുവന്‍ സമയവും ഗോള്‍രഹിതമായപ്പോള്‍ ഇഞ്ചുറി ടൈമിലെ രണ്ടാം മിനിറ്റില്‍ പിഎസ്ജി താരം ഉസ്മാനെ ഡെംബലെയാണ് വിജയ ഗോള്‍ നേടിയത്.

കളിയില്‍ ഉടനീളം പിഎസ്ജിയുടെ മധ്യനിര ഉണര്‍ന്നു കളിച്ചെങ്കിലും ഗോള്‍ നേടുന്നതില്‍ മുന്നേറ്റനിര പരാജയപ്പെടുകയായിരുന്നു. മൊറോക്കന്‍ താരം അഷ്‌റഫ് ഹാക്കിമിയും ബ്രസീലിയന്‍ സൂപ്പര്‍ താരം മാര്‍ക്വിനോസും നിരവധി അവസരങ്ങള്‍ സൃഷ്ടിച്ചു.

അതേസമയം ശക്തമായ മിന്നല്‍ പിണരുകളിലൂടെ എതിര്‍ ഗോള്‍മുഖത്ത് അപകടം സൃഷ്ടിക്കാന്‍ മൊണാക്കോക്ക് കഴിഞ്ഞെങ്കിലും ഗോള്‍ നേടാനായില്ല. ശക്തമായ പ്രതിരോധത്തിലൂടെ പിഎസ്ജി വിജയം നേടിയെടുക്കുകയായിരുന്നു.