ന്യൂഡൽഹി: മലയാളിയായ ജസ്റ്റിസ് കെ വിനോദ് ചന്ദ്രൻ സുപ്രീംകോടതി ജഡ്ജിയാകും. നിലവിൽ പട്ന ഹൈക്കോടതി ചീഫ് ജസ്റ്റിസ് ആയ അദ്ദേഹത്തെ സുപ്രീംകോടതി ജഡ്ജിയായി ഉയർത്താനാണ് കൊളിജിയം തീരുമാനം. 

2011ലാണ് ജസ്റ്റിസ് കെ വിനോദ് ചന്ദ്രൻ ഹൈക്കോടതി ജഡ്ജിയായി ചുമതലയേറ്റത്. പിന്നീട് 2023 മാർച്ചിൽ അദ്ദേഹം പാട്നയിൽ ചീഫ് ജസ്റ്റിസായി ചുമതലയേറ്റു.

സ്റ്റേറ്റ് ബാങ്ക് ഓഫ് ട്രാവൻകൂറിൽ ജോലി ചെയ്യവേ സായാഹ്ന പഠനത്തിലൂടെ നിയമബിരുദം നേടിയ അദ്ദേഹം തുടർന്ന് ബാങ്ക് ഉദ്യോഗം രാജിവെച്ച് അഭിഭാഷക വൃത്തിയിലേക്ക് കടന്നു. 1990ലാണ് അദ്ദേഹം അഭിഭാഷകനായി എൻ‌റോൾ ചെയ്യുന്നത്. 2011 നവംബർ എട്ടിന് ഹൈക്കോടതിയിൽ അഡീഷണൽ ജഡ്ജിയായി നിയമിതനായ അദ്ദേഹം 2013 ജൂൺ 24-ന് സ്ഥിരം ജഡ്ജിയായി. ചന്ദ്രബോസ് വധക്കേസിൽ വ്യവസായി മുഹമ്മദ് നിഷാമിന്റെ ജീവപര്യന്തം കഠിനതടവ് ശരിവച്ചത് ഉൾപ്പെടെ ശ്രദ്ധേയ വിധികൾ പുറപ്പെടുവിച്ചിട്ടുണ്ട്.

 The Supreme Court Collegium has decided to appoint Justice K Vinod Chandran as a Supreme Court judge.