റിയാദ്: 2025ലും തന്റെ ഗോളടിമികവ് ആവർത്തിച്ചിരിക്കുകയാണ് പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോ. സഊദി പ്രൊ ലീഗിൽ അൽ അഖ്ദൗദിനെതിരെയുള്ള മത്സരത്തിലാണ് റൊണാൾഡോ ഗോൾ നേടിയത്. മത്സരത്തിന്റെ 42ാം മിനിറ്റിൽ ലഭിച്ച പെനാൽറ്റി കൃത്യമായി ലക്ഷ്യത്തിൽ എത്തിക്കുകയായിരുന്നു റൊണാൾഡോ. ഈ ഗോൾ നേടിയതിനു പിന്നാലെ ഫുട്ബോൾ ചരിത്രത്തിൽ മറ്റൊരു താരത്തിനും എത്തിപ്പിടിക്കാൻ പറ്റാത്ത ചരിത്രനേട്ടത്തിലേക്കാണ് റൊണാൾഡോ നടന്നുകയറിയത്. 

തുടർച്ചയായി 24 വർഷങ്ങളിലും ഗോൾ നേടുന്ന ആദ്യ താരമായാണ് റൊണാൾഡോ മാറിയത്. 2002ൽ തുടങ്ങിയ റൊണാൾഡോയുടെ ഗോളടിമേളം ഇപ്പോൾ 2025ലും ഒരു മാറ്റവും ഇല്ലാതെ തുടരുകയാണ്. പോർച്ചുഗീസ് ക്ലബായ സ്‌പോർട്ടിംഗ് ലിസ്ബണിനൊപ്പം ആണ് റൊണാൾഡോ തന്റെ ഗോൾ യാത്രക്ക് തുടക്കം കുറിച്ചത്. പിന്നീട് മാഞ്ചസ്റ്റർ യുണൈറ്റഡ്, റയൽ മാഡ്രിഡ്, യുവന്റസ് എന്നീ ടീമുകൾക്ക് വേണ്ടിയും റൊണാൾഡോ ഗോളുകൾ അടിച്ചുകൂട്ടി. തന്റെ ഈ ഗോളടി മികവ് ഇപ്പോൾ അൽ നസറിലാണ് എത്തിനിൽക്കുന്നത്.

ക്ലബ്ബുകൾക്ക് വേണ്ടി മാത്രമല്ല തന്റെ ജന്മനാടായ പോർച്ചുഗലിന് വേണ്ടിയും ഗോളടിയിൽ മുന്നിൽ തന്നെയാണ് റൊണാൾഡോ. പോർച്ചുഗലിന്റെ എക്കാലത്തെയും മികച്ച ഗോൾ വേട്ടക്കാരിൽ ഒരാളാണ് റൊണാൾഡോ. ക്ലബ്ബുകൾക്ക് വേണ്ടിയും ദേശീയ ടീമിന്, വേണ്ടി ഇതുവരെ 917 ഗോളുകളാണ് റൊണാൾഡോ നേടിയിട്ടുള്ളത്. ൮൩ ഗോളുകൾ കൂടി നേടാൻ റൊണാൾഡോക്ക് സാധിച്ചാൽ 1.000  ഗോളുകൾ എന്ന നാഴികകളിലേക്കും റൊണാൾഡോക്ക് കാലെടുത്തുവെക്കാൻ സാധിക്കും 

ജനുവരി 17ന് അൽ താവൂണിനെതിരെയാണ് അൽ നസറിന്റെ അടുത്ത മത്സരം. വരാനിരിക്കുന്ന മത്സരങ്ങളിലും റൊണാൾഡോയുടെ ബൂട്ടുകളിൽ നിന്നും ഗോളുകൾ പിറക്കുമെന്നുതന്നെയാണ് ആരാധകർ ഉറച്ചുവിശ്വസിക്കുന്നത്.