ഇംഗ്ലണ്ടിനെതിരെയുള്ള പരമ്പരക്കായുള്ള തയ്യാറെടുപ്പിലാണ് ഇന്ത്യൻ ക്രിക്കറ്റ് ടീം. ഇംഗ്ലണ്ടിനെതിരെ സ്വന്തം തട്ടകത്തിൽ അഞ്ചു ട്വന്റി ട്വന്റിയും മൂന്ന് ഏകദിനവും ആണ് ഇന്ത്യ കളിക്കുക. ജനുവരി 22 മുതൽ ഫെബ്രുവരി രണ്ട് വരെയാണ് ട്വന്റി ട്വന്റി പരമ്പര നടക്കുക. ഇതിനു ശേഷം ഫെബ്രുവരി ആറ് മുതൽ 12 വരെ മൂന്ന് ഏകദിന മത്സരങ്ങളും നടക്കും. ഈ ട്വന്റി ട്വന്റി പരമ്പരക്കുള്ള ഇന്ത്യൻ ടീമിനെ കഴിഞ്ഞ ദിവസം പ്രഖ്യാപിച്ചിരുന്നു.

ഈ പരമ്പരയിൽ ഇന്ത്യൻ ട്വന്റി ട്വന്റി ക്യാപ്റ്റൻ സൂര്യകുമാർ യാദവിനെ കാത്തിരിക്കുന്നത് ഒരു തകർപ്പൻ നേട്ടമാണ്. പരമ്പരയിൽ അഞ്ചു സിക്സുകൾ കൂടി നേടാൻ സൂര്യകുമാർ യാദവിന്‌ സാധിച്ചാൽ ഇന്റർനാഷണൽ ടി-20യിൽ 150 സിക്സുകൾ എന്ന നേട്ടത്തിലേക്ക് നടന്നുകയറാം. നിലവിൽ 78 ടി-20 മത്സരങ്ങളിൽ നിന്നും 145 സിക്സുകളാണ് സൂര്യകുമാർ നേടിയിട്ടുള്ളത്. 

150 സിക്സുകൾ പൂർത്തിയാക്കിയാൽ ട്വന്റി ട്വന്റിയിൽ 150 സിക്സുകൾ നേടുന്ന രണ്ടാമത്തെ ഇന്ത്യൻ താരമായി മാറാനും സൂര്യക്ക് സാധിക്കും. ഇതിനു മുമ്പ് ഈ നേട്ടത്തിലെത്തിയ ഏക ഇന്ത്യൻ താരം രോഹിത് ശർമ്മ മാത്രമാണ്. 159 മത്സരങ്ങളിൽ നിന്ന് 205 സിക്സറുകളാണ് രോഹിത് അടിച്ചെടുത്തത്. 

ഇംഗ്ലണ്ടിനെതിരെയുള്ള ട്വന്റി ട്വന്റി പരമ്പരക്കുള്ള ഇന്ത്യൻ സ്‌ക്വാഡ്

സൂര്യകുമാർ യാദവ് (ക്യാപ്റ്റൻ), സഞ്ജു സാംസൺ (വിക്കറ്റ് കീപ്പർ), അഭിഷേക് ശർമ്മ, തിലക് വർമ്മ, ഹർദിക് പാണ്ഡ്യ, റിങ്കു സിംഗ്, നിതീഷ് കുമാർ റെഡ്ഡി, അക്സർ പട്ടേൽ (വൈസ് ക്യാപ്റ്റൻ), ഹർഷിത് റാണ, അർഷ്ദീപ് സിംഗ്, മുഹമ്മദ് ഷമി, വരുൺ ചക്രവർത്തി , രവി ബിഷ്‌ണോയ്, വാഷിംഗ്ടൺ സുന്ദർ, ധ്രുവ് ജുറെൽ (വിക്കറ്റ് കീപ്പർ).