ഭോപ്പാല്‍: നാല് കുട്ടികള്‍ക്ക് ജന്മനം നല്‍കുന്നവര്‍ക്ക് ഒരു ലക്ഷം രൂപ പാരിതോഷികം പ്രഖ്യാപിച്ച് പരശുറാം കല്യാണ്‍ ബോര്‍ഡ്. മധ്യപ്രദേശിലെ ബ്രാഹ്മണരുടെ ക്ഷേമത്തിനായുള്ള സര്‍ക്കാര്‍ സമിതിയാണ് ഇത്. ബോര്‍ഡിന്റെ പ്രസിഡന്റായ പണ്ഡിറ്റ് വിഷ്ണു രജോരിയയാണ് പുതിയ വാഗ്ദാനവുമായി രംഗത്തെത്തിയത്. 

നാട്ടില്‍ മതനിഷേധികളുടെ എണ്ണം വര്‍ധിക്കുകയാണ്. യുവാക്കള്‍ ഒരു കുട്ടിക്ക് മാത്രം ജന്മം നല്‍കുന്നതോടെ നിര്‍ത്തുന്നത് വലിയ പ്രശ്‌നമായി മാറിക്കൊണ്ടിരിക്കുന്നു. കുറഞ്ഞത് നാല് കുട്ടികളെങ്കിലുമുള്ള ദമ്പതിമാര്‍ക്ക് പരശുറാം കല്യാണ്‍ ബോര്‍ഡ് ഒരു ലക്ഷം രൂപ നല്‍കും. ബോര്‍ഡിന്റെ പ്രസിഡന്റ് ഞാനാണെങ്കിലും അല്ലെങ്കിലും തുക വിതരണം ചെയ്യുന്നത് തുടരും,' വിഷ്ണു രജോരിയ പറഞ്ഞു. 

അതേസമയം മുതിര്‍ന്നവരില്‍ നിന്ന് ഞാന്‍ കൂടുതലൊന്നും പ്രതീക്ഷിക്കുന്നില്ലെന്നും, എന്നാല്‍ യുവാക്കളില്‍ തനിക്ക് വലിയ പ്രതീക്ഷയുണ്ടെന്നും ഇയാള്‍ കൂട്ടിച്ചേര്‍ത്തു. 

കുട്ടികളുടെ വിദ്യാഭ്യാസം ചെലവേറിയതാണെന്നാണ് യുവാക്കള്‍ പറയുന്നത്. പക്ഷേ നിങ്ങള്‍ കുട്ടികള്‍ക്ക് ജന്മം നല്‍കാന്‍ മടിക്കരുത്. അല്ലെങ്കില്‍ ദൈവനിഷേധികള്‍ രാജ്യം പിടിച്ചെടുക്കും. ഭാവി തലമുറയുടെ സംരക്ഷണം നിങ്ങളുടെ ഉത്തരവാദിത്തമാണ്,' രജോരി കൂട്ടിച്ചേര്‍ത്തു.

Parasuram Kalyan Board announces Rs1 lakh prize for those who give birth to four children in madhyaprasesh