റിയാദ്: ഫുട്ബോളിൽ ഒരു ക്ലബ്ബിന്റെ ഉടമയാകാൻ സൂപ്പർതാരം ക്രിസ്റ്റ്യാനോ റൊണാൾഡോ ഒരുങ്ങുന്നു. നിലവിൽ റൊണാൾഡോ കളിച്ചുകൊണ്ടിരുന്ന അൽ നസറിന്റെ തന്നെ ഓഹരികൾ ആയിരിക്കും റൊണാൾഡോ സ്വന്തമാക്കുകയെന്നാണ് റിപ്പോർട്ടുകൾ സൂചിപ്പിക്കുന്നത്. 

റൊണാൾഡോക്ക് ക്ലബ്ബിന്റെ അഞ്ചു ശതമാനം ഓഹരികൾ വാഗ്‌ദാനം നൽകിയെന്നാണ് ലഭിക്കുന്ന വിവരങ്ങൾ. അൽ നസറിനൊപ്പമുള്ള റൊണാൾഡോയുടെ കരാർ ഈ വർഷം അവസാനിക്കും. ടീമുമായുള്ള പുതിയ കരാർ 2026 ജൂൺ വരെ റൊണാൾഡോ നീട്ടുമെന്നാണ് പുറത്തുവരുന്ന വിവരങ്ങൾ. പുതിയ കരാറിന്റെ ഭാഗമായി റൊണാൾഡോക്ക് വമ്പൻ തുക ലഭിക്കുമെന്നാണ് പ്രതീക്ഷിക്കുന്നത്. 

2023ൽ മാഞ്ചസ്റ്റർ യുണൈറ്റഡിൽ നിന്നുമാണ് റൊണാൾഡോ അൽ നസറിൽ എത്തുന്നത്. റൊണാൾഡോയുടെ വരവിന് പിന്നാലെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. റൊണാൾഡോക്ക് പുറമേ യൂറോപ്പ്യൻ ക്ലബ്ബുകളിലെ വമ്പൻ താരനിര സഊദിയിലേക്ക് കൂടു മാറിയിരുന്നു. കരിം ബെൻസിമ, നെയ്മർ, സാദിയോ മാനെ, റിയാദ് മെഹറസ്, റോബർട്ടോ ഫിർമീഞ്ഞോ തുടങ്ങിയ പ്രധാന താരങ്ങളും സഊദിയിലേക്ക് മാറിയിരുന്നു.

സഊദി ടീമിന് വേണ്ടി ഇതുവരെ തകർപ്പൻ പ്രകടനങ്ങളാണ് റൊണാൾഡോ നടത്തിക്കൊണ്ടിരിക്കുന്നത്. അൽ നസറിനായി 84 മത്സരങ്ങളിൽ നിന്നും 75 ഗോളുകളും 18 അസിസ്റ്റുകളുമാണ് റൊണാൾഡോ നേടിയിട്ടുള്ളത്. 2023-24 സീസണിൽ 45 മത്സരങ്ങളിൽ നിന്നും 44 ഗോളുകളും 13 അസിസ്റ്റുകളുമായിരുന്നു റൊണാൾഡോ നേടിയിരുന്നത്. ഇതിൽ സഊദി ലീഗിൽ 35 ഗോളുകളുമാണ് റൊണാൾഡോ അടിച്ചുകൂട്ടിയത്. സഊദി പ്രോ ലീഗിലെ കഴിഞ്ഞ സീസണിലെ ടോപ് സ്കോററും റൊണാൾഡോ തന്നെയാണ്.