ക്വാലാലംപൂർ: വിമൺസ് അണ്ടർ 19 ലോകകപ്പിൽ വെസ്റ്റ് ഇൻഡീസിനെതീരെ ഇന്ത്യക്ക് തകർപ്പൻ ജയം. ഒമ്പത് വിക്കറ്റുകൾക്കാണ് വിൻഡീസിനെ ഇന്ത്യൻ പെൺപട തകർത്തുവിട്ടത്. ബയുമാസ് ഓവലിൽ നടന്ന മത്സരത്തിൽ ടോസ് നേടിയ ഇന്ത്യ ഫീൽഡിംഗ് തെരഞ്ഞെടുക്കുകയായിരുന്നു. ഇന്ത്യയുടെ ഈ തീരുമാനം ശരിവെക്കുന്നതായിരുന്നു പിന്നീട് ഗ്രൗണ്ടിൽ കണ്ടത്. 

ആദ്യം ബാറ്റ് ചെയ്ത വിൻഡീസിനെ 13.2 ഓവറിൽ 44 റൺസിനാണ് ഇന്ത്യ എറിഞ്ഞു വീഴ്ത്തിയത്. വിജയലക്ഷ്യം പിന്തുടർന്നിറങ്ങിയ ഇന്ത്യ 4.2 ഓവറിൽ ഒരു വിക്കറ്റ് നഷ്ടത്തിൽ ലക്ഷ്യം അനായാസമായി മറികടക്കുകയായിരുന്നു. 

പരുണിക സിസോദിയ മൂന്ന് വിക്കറ്റുകൾ വീഴ്ത്തിയപ്പോൾ മലയാളി താരം ജോഷിതാ, ആയുഷി ശുക്ല എന്നിവർ ഓരോ വിക്കറ്റുകളും നേടി തിളങ്ങി. അഞ്ചു റൺസ് വിട്ടുനൽകിയാണ് ജോഷിതാ രണ്ട് വിക്കറ്റുകൾ വീഴ്ത്തിയത്. ഈ തകർപ്പൻ പ്രകടനങ്ങൾക്ക് പിന്നാലെ മത്സരത്തിലെ പ്ലെയർ ഓഫ് ദി മാച്ച് അവാർഡും മലയാളി താരമാണ് സ്വന്തമാക്കിയത്. 

വിൻഡീസ് ബാറ്റിങ്ങിൽ 29 പന്തിൽ 15 റൺസ് നേടിയ കെനിക കാസർ മാത്രമാണ് പിടിച്ചു നിന്നത്. ബാക്കിയുള്ള താരങ്ങൾക്കൊന്നും കാര്യമായി ഒന്നും ചെയ്യാൻ സാധിച്ചില്ല. ഇന്ത്യക്കായി സനിക ചാൽകെ 11 പന്തിൽ പുറത്താവാതെ 18 റൺസും ജി കമാലിനി 13 പന്തിൽ 16 റൺസും നേടിയപ്പോൾ ഇന്ത്യ അനായാസം വിജയിക്കുകയായിരുന്നു.